Doreza e famshme e “Moonwalk”-it del në ankand me vlerë deri në 800 mijë dollarë

Disa prej veshjeve më ikonike të Michael Jacksonit, të cilat kanë shoqëruar performancat më të famshme të karrierës së tij, do të dalin sërish në ankand, duke u ofruar koleksionistëve mundësinë të bëhen pronarë të pjesëve të historisë së muzikës pop.

Ndër objektet më të veçanta është xhaketa e kuqe dhe e zezë prej lëkure, e veshur nga Mbreti i Popit në videoklipin legjendar “Thriller”, të publikuar në vitin 1983.

Bëhet fjalë për njërën nga dy xhaketat origjinale të krijuara për këtë videoklip. Modeli që do të dalë në ankand është përdorur në skenat ku Jackson shfaqet pa makijazhin e zombit, ndërsa xhaketa tjetër, e përdorur gjatë skenave të transformimit, ndodhet në pronësi të trashëgimtarëve të këngëtarit.

Një tjetër objekt që pritet të tërheqë vëmendje të madhe është doreza e bardhë e zbukuruar me gurë, të cilën Jackson e mbajti gjatë performancës historike në “Motown 25”, në vitin 1983, kur prezantoi për herë të parë para publikut televiziv lëvizjen e famshme “Moonwalk”.

Shtëpia e ankandeve Julien’s Auctions e ka vlerësuar dorezën nga 600 mijë deri në 800 mijë dollarë. Ajo ishte shitur më parë, në vitin 2009, për 430 mijë dollarë, duke vendosur atëherë rekord për një dorezë të përdorur nga këngëtari.

Në ankand do të përfshihen edhe dy palë këpucë të zeza të Michael Jackson, të përdorura gjatë xhirimeve të “Thriller” dhe performancës në “Motown 25”, vlera e të cilave parashikohet të arrijë deri në 80 mijë dollarë.

Ngjarja do të mbahet në Abu Dhabi, nga 7 deri më 9 dhjetor, në kuadër të një ankandi të madh të organizuar nga Julien’s Auctions. Krahas objekteve të Michael Jackson, në shitje do të jenë edhe veshje të Princeshës Diana, si dhe sende që lidhen me artistë dhe figura të tjera të njohura të kulturës pop.

Xhaketa e “Thriller” nuk ka ende një çmim fillestar të publikuar, por pritet të jetë ndër objektet më të kërkuara të këtij ankandi. /kultplus