64-vjetori i teatrit “Skampa” të Elbasanit, emrat që bënë histori

Më 16 korrik 1962 u themelua teatri profesionist “Skampa” i Elbasanit, një ngjarje që shënoi një etapë të rëndësishme në historinë e artit skenik shqiptar.

Regjisori i parë i trupës ishte Lec Shllaku, ndërsa pjesë e trupës ishin aktorët Skënder Hoxha, Haxhi Sejko, Thanas Borodani, Hysni Hatibi, Demir Hyskja, Antoneta Kristo etj.

Në vitet e para, trupa e aktorëve profesionistë u formua nga talentet më të spikatura të lëvizjes amatore dhe entuziastët e skenës në qytetin e Elbasanit.

Teatri “Skampa” ndodhet në zemër të qytetit të Elbasanit, një vendndodhje që e bën atë jo vetëm lehtësisht të aksesueshëm për banorët dhe vizitorët, por edhe një pikë referimi brenda jetës kulturore të qytetit.

Për dekada, “Skampa” ka qenë vendi ku janë zhvilluar premiera dramatike, komedi, tragjedi dhe shfaqje të ndryshme skenike. Trupa e teatrit ka interpretuar vepra klasike dhe bashkëkohore, duke ndikuar në mënyrë të dukshme në formimin artistik dhe kulturor të audiencës, dhe duke nxjerrë aktorë të shquar të skenës shqiptare.

Përtej sezonit të zakonshëm të shfaqjeve, teatri ka një faktor të rëndësishëm nxitës të artit bashkëkohor edhe përtej skenës lokale: Festivali ndërkombëtar i teatrit “Skampa”.

Që prej fundit të viteve 1990 ky festival është bërë një nga ngjarjet kryesore teatrore në vend, duke sjellë në Elbasan trupa të shumta nga Shqipëria, Evropa, Ballkani dhe më gjerë. Festivali tërheq me mijëra vizitorë dhe artistë nga vende të ndryshme, duke sjellë në qytetin e Elbasanit një atmosferë dinamike artistike që tejkalon skenën e mbyllur të teatrit, për t’u zhvilluar edhe në hapësira urbane dhe aktivitete të hapura për publikun. /atsh