Luana Bajrami fiton në Oscars me filmin që interpretoi rolin kryesor

Filmi i shkurtër “Two People Exchanging Saliva”, në të cilin aktorja shqiptare Luana Bajrami ka rolin kryesor, ka arritur të fitojë një nga çmimet Oscars dje në ceremoninë e mbajtur në Los Angeles.

Filmi arriti të marrë çmimin “Best Live Action Short Film” në edicionin e 98-të të ngjarjes, teksa në skenë u ngjit edhe vetë Bajrami gjatë ceremonisë.

Bajrami që luan rolin e Malaise, interpreton shitësen e një dyqani luksoz në rrëfimin kinematografik që shpërfaq luftën e mentaliteteve dhe kontrollin shoqëror. Filmi është krijuar nën regjinë e skenarin e përbashkët të Natalie Musteata dhe Alexandre Singh,raporton rtk.

Bajrami është e njohur për disa suksese kinematografike tashmë, duke arritur që të bëjë regjinë e shumë prej filmave të prodhuara nga produksione franceze. Në skenën vendore ajo më së shumti njihet për regjinë e filmit “Luaneshat e Kodrës”, i cili arriti të jepej premierë në festivalin prestigjioz të filmit në Cannes.