Policia kërkon ndihmën e qytetarëve për identifikimin e një të dyshuari në Gjakovë

Drejtoria Rajonale e Policisë në Gjakovë, përmes Stacionit Policor dhe Sektorit të Hetimeve, po kërkon bashkëpunimin e qytetarëve për identifikimin dhe lokalizimin e një personi të dyshuar për kryerjen e veprave penale “Kanosje” dhe “Sulm”.

Ngjarja ka ndodhur më 12 tetor 2025 në një qendër tregtare në Gjakovë, ndërsa, pavarësisht hetimeve të deritanishme, identiteti i të dyshuarit ende nuk është zbuluar.

Policia fton çdo qytetar që disponon informacione relevante ose e njeh personin që shihet në fotografi, të kontaktojë menjëherë:

Përmes numrit emergjent 192

Në stacionin policor më të afërt

Ose përmes e-mailit zyrtar [email protected].

Autoritetet sigurojnë se çdo informacion do të trajtohet me konfidencialitet të plotë dhe sipas legjislacionit në fuqi.