Prishtinë: Plagoset me armë zjarri një person në lagjen “Arbëria”

Një person është plagosur nga arma e zjarrit në lagjen Arbëria të Prishtinës përkatësisht në rrugën “Mine Peza” në Prishtinë.

Zëdhënësi i Policisë së Kosovës për Rajonin e Prishtinës, Agron Borovci ka thënë se i plagosuri është dërguar në QKUK për trajtim mjekësor.

“Rreth orës 19:00, është raportuar për shkrepje të armës së zjarrit në rrugën ‘Mine Peza’ në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se një person është plagosur nga arma e  zjarrit dhe se i njëjti është dërguar në QKUK për trajtimin e nevojshëm mjekësor”, ka thënë Borovci.

Ai ka bërë të ditur se policia ka identifikuar një të dyshuar të përfshirë në rastin në fjalë, po ashtu edhe dy vetura.

“Policia po vazhdon punën operativo-hetimore si dhe të ekzaminimit të vendngjarjes me qellim të sqarimin e plotë të rrethanave që karakterizojnë ngjarjen”, ka shtuar Borovci.