Kosova dhe Maqedonia e Veriut nënshkruajnë marrëveshje për sektorin e energjisë

Në mbledhjen e sotme të përbashkët të Qeverisë së Kosovës dhe Qeverisë së Maqedonisë së Veriut, janë nënshkruar 11 memorandume bashkëpunimi.

Në kuadër të Ministrisë së Ekonomisë të Kosovës dhe asaj së Maqedonisë së Veriut, ministrja Artane Rizvanolli dhe ministri Kreshnik Bekteshi kanë nënshkruar Memorandumin e Mirëkuptimit për sektorin e energjisë.

Përmes një njoftimi thuhet se ky memorandum është nënshkruar duke pasur parasysh rëndësinë e sigurisë së furnizimit me energji elektrike për zhvillimin ekonomik në Kosovë dhe Maqedoni të Veriut, si dhe mungesën e kapaciteteve gjeneruese dhe llojshmërinë e tyre në të dy vendet.

“Në këtë memorandum theksohet rëndësia dhe përfitimet e bashkëpunimit dypalësh në sektorin e energjisë dhe burimet energjetike në përfitimin reciprok në përputhje me parimet e Legjislacionit të BE-së dhe Traktatit për themelimin e Komunitetit të Energjisë”, thuhet në njoftim.

Gjatë kësaj mbledhjeje, Rizvanolli ka cekur se “Synimet e njëjta si dekarbonizimi i sektorit, diversifikimi i burimeve dhe integrimi i burimeve të ripërtërishme të energjisë e bëjnë më të rëndësishëm se kurrë krijimin e kushteve teknike e tregtare për bashkëpunim më të ngushtë. Në këtë mënyrë do të sigurojmë fleksibilitet të sistemit, siguri dhe cilësi të furnizimit, si dhe tarifa më të lira për konsumatorët”.

Memorandumi i përbashkët ka për qëllim të arrijë furnizim më të sigurt të energjisë për Kosovën, Maqedoninë e Veriut, për Evropën Juglindore dhe Bashkimin Evropian në përgjithësi.

Në njoftim thuhet se ky lehtësim i bashkëpunimit mes të dyja vendeve do të fokusohet në fushat prioritare të cilat përfshijnë; sektorin e energjisë, burimet e ripërtërishme të energjisë, efiçiencën e energjisë dhe sigurinë e furnizimit.

“Përfitimet për qytetarët dhe bizneset tona do të jenë të prekshme, prandaj motivi ynë për realizim është i fortë dhe nuk do të mbetet vetëm në letër”, ka shtuar Rizvanolli. /Zëri