Vendet e G7-ës do të mbështesin një taksë minimale globale për korporatat
Ministrat e Financave nga grupi i shtatë vendeve të pasura (G7) do të zotohen këtë javë për të mbështetur ekonomitë e tyre tani kur po dalin nga pandemia dhe të arrijnë një marrëveshje “ambicioze” për taksa minimale globale korporative, ka treguar një draft-komunikatë, raporton “Reuters”.
Zyrtarët e G7-ës, që do të takohen në Londër më 4-5 qershor, do të deklarojnë gjithashtu se sapo rimëkëmbja të kthehet në binarë, ata do të duhet të “sigurojnë qëndrueshmëri afatgjatë të financave publike”, e cila kuptohet të jetë kod për një tërheqje graduale të stimulit, transmeton Zeri.info.
Grupi G7 përbëhet nga SHBA-ja, Japonia, Britania e Madhe, Gjermania, Franca, Italia dhe Kanadaja.
“Ne angazhohemi që të mos tërheqim mbështetjen e policave shumë shpejt dhe të investojmë për të nxitur rritjen, krijimin e vendeve të punës me cilësi të lartë dhe adresimin e ndryshimeve klimatike dhe pabarazive”, thuhet në draft-komunikatën e parë nga “Reuters”.
“Sapo rikuperimi të vendoset fort, duhet të sigurojmë qëndrueshmërinë afatgjatë të financave publike për të na mundësuar që t'i përgjigjemi krizave të ardhshme”, theksohet në draft, pa specifikuar se si G7 do ta konsideronte rikuperimin të konsiderohej i fortë.
Qeveritë e G7-ës kanë hedhur triliona dollarë në ekonomitë e tyre për t’i mbajtur gjallë që nga nisja e pandemisë marsin e vitit të kaluar teksa izolimet e vazhdueshme e çuan botën në një recesion të thellë.
Për të ndihmuar në zbutjen e tendosjes në financat publike, drafti tha se G7-a mbështeti fuqimisht përpjekjet e Organizatës për Bashkëpunim Ekonomik dhe Zhvillim (OECD) për të vendosur një nivel minimal global të taksave të korporatave që do të siguronte që korporata të mëdha shumëkombëshe të paguanin hisen e tyre të ndershme të taksave.
Një taksë e tillë do të kishte për synim zgjidhjen e problemit të kompanive të mëdha që gjenerojnë të hyra të mëdha vjetore por paguajnë shumë pak taksa sepse kanë të themeluara zyra me qëllime taksative në juridiksione me taksa të ulëta.
Zgjidhja në të cilën OECD-ja po punon do të detyronte një nivel minimal global të taksave për të gjitha të hyrat vjetore korporative, pavarësisht se ku një kompani e ka selinë për qëllime taksative.
“Ne angazhohemi për të arritur një zgjidhje të drejtë për shpërndarjen e të drejtave të taksimit dhe për një nivel të lartë ambicieje mbi normën për një taksë minimale globale”, tha drafti, pa përmendur ndonjë shifër.
SHBA-ja ka propozuar në maj për të caktuar një taksë minimale prej 15%, që është ulje nga 21% që e kishte propozuar në prill, ndërsa propozimi më i ulët mori mbështetje të gjerë në Evropë.
“Ne... presim me padurim në arritjen e një marrëveshjeje në takimin e korrikut të ministrave të financave të G20-ës dhe guvernatorëve të bankave qendrore”, tha më tej drafti i G7-ës. /Zëri
