Ish-kreu i OEK-ut e quan “fontanë dëshirash” rimëkëmbjen ekonomike në vitin 2022
Ish-kryetari i Odës Ekonomike të Kosovës (OEK) Safet Gërxhaliu në një intervistë për Ekonomia Online tha se rimëkëmbja ekonomike e Kosovës në vitin 2022 është fontanë dëshirash.
Krejt kjo nuk mund të ndodhë pasi sipas tij ka pasur shumë keqpërdorime me pakot emergjente.
Paralajmërimin e Bankës Botërore që gjashtë vendet e Ballkanit Perëndimor pritet të kenë sërish rritje ekonomike gjatë vitit 2021me 4,4 për qind ai po e sheh me skepticizëm.
Madje sipas Bankës Botërore ritmi i rritjes ekonomike pritet të stabilizohet në 3,7 për qind përgjatë viteve 2022 dhe 2023.
Por, sipas Gërxhaliut, në Ballkanin Perëndimor shumë vende kanë pësuar deri në 15% rënie të trendëve ekonomikë dhe se kjo kërkon kohë, angazhim, mbështetje, partneritet dhe përkushtim.
“Për institucionet e ndryshme dhe organizatat ndërkombëtare është lehtë të hartojnë plane dhe për të dhënë prognoza të tilla për rimëkëmbjen, mirëpo realiteti në Ballkanin Perëndimor është krejt ndryshe, në veçanti sa i përket Kosovës se vetë fakti se institucionet e ndryshe ndërkombëtare paralajmërojnë se pandemia do të shuhet në vitin 2022 dhe lindi pyetja si do të ketë rimëkëmbje të ekonomisë, në Ballkanin Perëndimor kur shumë vende kanë pësuar deri në 15% rënie të trendëve ekonomikë dhe e tëra kjo kërkon kohë angazhim, mbështetje, partneritet dhe përkushtim”.
Madje, sipas tij, nëse vendeve të rajonit u duhen dy vjet që ekonomia të marrë veten, Kosova do të ketë nevojë për dyfishin e kohës.
“…kur është në pyetja Kosova, vërtet se vendet e rajonit e kanë pasur një fat që qeveritë e rajonit kanë bërë më tepër për të mbështetur bizneset dhe qytetarët, ndërsa në Kosovë ne kemi parë vetëm dy pako, pakoja emergjente e marsit 2020 dhe pakoja emergjente e tetorit në vitin 2020, mirëpo nga vetë fakti që kemi pasur keqpërdorim ose qasje selektive në vend që ato t’i ndërmarrin bizneset e vogla, qytetarët dhe ekonomitë e varfra ato kanë shkuar në kontot e kompanive, të cilat më së shumti kanë përfituar nga pandemia, e kanë dyfishuar qarkullimin në kohën e pandemisë dhe të mendohet se Kosova do të ketë rimëkëmbje ekonomike në vitin 2022 është një fontanë dëshirash e vështirë për t’u realizuar dhe nëse vendeve të rajonit u duhen dy vjet, Kosovës do t’i duhet dyfishi”, tha ai.
