Irani kërcënon me mbylljen e Ngushticës së Hormuzit: Asnjë pikë nafte nuk do të kalojë
Teherani ka kërcënuar se do të ndalojë qarkullimin e naftës përmes Ngushticës së Hormuzit, nëse ndonjë prej vendeve fqinje të Iranit i bashkohet luftës ekonomike të presidentit amerikan Donald Trump.
Mohsen Rezaei, sekretar i Këshillit të Lartë të Sigurisë Kombëtare të Iranit, tha se Teherani synon të “neutralizojë luftën ekonomike” të SHBA-së.
“Amerika është futur në një qoshe. Ose i respekton angazhimet e saj, ose do të duhet të luftojë për të dalë nga ajo qoshe, gjë që do ta përkeqësojë situatën”, deklaroi Rezaei në një fjalim televiziv të shtunën mbrëma.
Ai paralajmëroi se nëse vendet fqinje të Iranit ndërmarrin veprime në kuadër të fushatës ekonomike amerikane, Teherani do të mbyllë të gjithë trafikun e naftës përmes Gjirit Persik, shkruan CNN, transmeton Klankosova.tv.
“Nëse fillojnë një veprim të tillë, nuk do të lejojmë që asnjë pikë nafte të kalojë përmes Gjirit Persik. Nafta nuk do të kalojë as përmes Ngushticës së Hormuzit dhe as përmes Gjirit Persik”, tha Rezaei.
Megjithatë, Irani ka lejuar së fundmi disa cisterna irakiane të naftës të kalojnë përmes Ngushticës së Hormuzit, duke treguar se Teherani po lejon kalime të kufizuara në këtë rrugë strategjike ujore.
Rezaei tha se Irani ka transportuar rreth 70 milionë fuçi naftë vetëm gjatë një ose dy muajve të fundit, pavarësisht bllokadës amerikane ndaj porteve iraniane, e cila është rikthyer në mesin e korrikut.
Ndërkohë, sipas Departamentit amerikan të Energjisë, përmes Ngushticës së Hormuzit po kalojnë mesatarisht 8 deri në 9 milionë fuçi naftë në ditë.
Për të shmangur zbulimin, disa kompani të naftës po përdorin cisterna që çaktivizojnë transmetuesit e tyre dhe kryejnë atë që njihet si “kalim i fshehtë” përmes ngushticës.
Me mbështetjen e marinës amerikane, këto cisterna transportojnë naftën nga Gjiri Persik përmes Ngushticës së Hormuzit drejt Gjirit të Omanit, ku ngarkesa u dorëzohet cisternave të tjera përpara se të rikthehen nëpër të njëjtën rrugë.
Kërcënimi i Iranit për mbylljen e Ngushticës së Hormuzit ka rritur shqetësimet për furnizimin global me naftë, pasi kjo rrugë ujore është një prej korridoreve më të rëndësishme të transportit të energjisë në botë.
