Mbi 2 mijë pjesëtarë të emergjencës luftojnë me zjarret në Portugali

Më shumë se 2 mijë pjesëtarë të emergjencës dhe rreth 20 avionë po vazhdojnë luftën kundër zjarreve që kanë përfshirë Portugalinë ditët e fundit, raporton Euronews.

Tri vatra të konsideruara të rëndësishme vazhdojnë të jenë aktive, ndërsa më shqetësuesja është ajo në Torre de Moncorvo, në distriktin e Bragançës. Më shumë se 400 pjesëtarë të emergjencës, mbi 140 automjete dhe katër avionë janë angazhuar në terren.

Në Torre de Moncorvo janë djegur më shumë se 2 mijë hektarë që nga e shtuna.

Një tjetër zjarr vazhdon në Arouca, ku janë angazhuar më shumë se 300 zjarrfikës, rreth 100 automjete dhe dy avionë. Zjarri kishte katër fronte aktive, ndërsa Mbrojtja Civile ka ndërmarrë masa parandaluese në disa komunitete.

Në Santo Tirso, rreth 200 pjesëtarë të emergjencës, më shumë se 60 automjete dhe një avion po luftojnë me flakët. Zjarri atje ka djegur më shumë se 900 hektarë.

Ndërkohë, nëntë distrikte të Portugalisë janë vendosur nën paralajmërim portokalli, ndërsa në disa rajone priten temperatura mbi 40 gradë Celsius.

Kryeministri Luís Montenegro ka paralajmëruar se vendi ka përpara “javë me vështirësi të shtuara”, duke e përshkruar vitin 2026 si “një tjetër vit të vështirë” për zjarret pyjore. /Euro News