Ende asnjë marrëveshje mes SHBA-së dhe Iranit
Një mbledhje për vlerësimin e situatës lidhur me luftën meIranin, zhvilluar në Shtëpinë e Bardhë, përfundoi pa ndonjë vendim nga Presidenti Donald Trump. Sipas gazetës "New York Times", e cila citon një zyrtar amerikan, Trumpi u largua nga takimi i zhvilluar në qendrën e menaxhimit të krizave pas dy orësh. Sipas mediave Presidenti amerikan shprehu optimizëm, por ende nuk e ka miratuar kornizën e marrëveshjes për paqen me Iranin.
Marrëveshja duhet t'u përgjigjet "vijave të demarkacionit" të Trumpit
Presidenti amerikan kishte njoftuar më herët në platformën e tij Truth Social se do të merrte një "vendim përfundimtar” lidhur me negociatat me Iranin. Se përse ai, ndryshe nga sa kishte njoftuar e tij, nuk mori ndonjë vendim, ende nuk dihet.
"Presidenti Trump do të lidhë vetëm një marrëveshje që është e mirë për Amerikën dhe që përputhet me vijat e tij të demarkacionit”, tha një përfaqësues i Shtëpisë së Bardhë pas takimit. Sipas tij, Irani nuk duhet të arrijë kurrë që të zotërojë armë bërthamore.
Bisedimet deri tani pa rezultat
Takimi u zhvillua në të ashtuquajturën Situation Room, një qendër e sigurt operacionale në Shtëpinë e Bardhë, e cila është e mbrojtur nga përgjimet. Aty presidenti i SHBA-së takohet, ndër të tjera, me përfaqësues të organeve të sigurisë kombëtare, të ushtrisë dhe të shërbimeve sekrete.
Prej disa ditësh SHBA-ja dhe Irani po zhvillojnë negociata intensive për një marrëveshje që do t'i jepte fund luftës me Iranin. Sipas njoftimeve duket se marrëveshja është shumë pranë arritjes.
Megjithatë, deri së fundmi ishte e paqartë nëse presidenti Trump do ta miratonte marrëveshjen e negociuar nga ndërmjetësuesit. Po ashtu, ende mungonte një konfirmim zyrtar nga udhëheqja iraniane./DW
