Lituania mbylli hapësirën ajrore, pas raportimeve për dronë në kufi

“Alarm ajror! Shkoni menjëherë në një strehimore ose në një vend të sigurt”, thuhej në njoftimin emergjent të ushtrisë lituane mëngjesin e sotëm.

Alarmi ajror në Vilnius është hequr rreth orës 10:58 të së mërkurës, pasi më herët ishte raportuar për një dron të dyshuar pranë rajoneve kufitare.

Forcat e armatosura të Lituanisë aktivizuan misionin e NATO-s për patrullim ajror dhe shpallën alarm ajror në Vilnius, pasi një dron i dyshuar u zbulua pranë kufirit të vendit të mërkurën në mëngjes, raporton transmetuesi publik i Lituanisë, transmeton Zeri.info.

Detaje mbi mënyrën e veprimit gjatë një sulmi ajror janë publikuar në faqen zyrtare të reagimit emergjent të qeverisë, LT72.lt.

“Ky incident është i ngjashëm me ato që kemi parë ditët e fundit në Letoni dhe Estoni; paralajmërimi i banorëve është një masë standarde parandaluese”, deklaroi ushtria në një njoftim të mëhershëm.

Aktiviteti i dronit u regjistrua në zonat pranë kufirit, afër distrikteve Ignalina, Utena, Zarasai dhe Svencionys në lindje të Lituanisë. Më vonë paralajmërimi u zgjerua edhe në kryeqytetin Vilnius dhe rajonin përreth.

Banorët e këtyre zonave morën mesazhe alarmuese për praninë e mundshme të një droni në afërsi, fillimisht me nivel të verdhë të kërcënimit ajror. Në rajonin e Vilniusit, alarmi më pas u ngrit në nivelin “i kuq”, që nënkupton rrezik urgjent.

Ushtria lituane bëri të ditur se misioni i NATO-s për patrullim ajror në Baltik u aktivizua pasi sinjali në radar u detektua brenda territorit të Bjellorusisë. /Zëri