Kryetari i Kievit paralajmëron evakuime nëse humbet energjia elektrike

Banorët e Kievit duhet të përgatiten të largohen nga qyteti nëse ka një humbje totale të energjisë, tha kryebashkiaku Vitaliy Klitschko.

Në javët e fundit miliona ukrainas po përballen me ndërprerje të energjisë elektrike dhe mungesë të ujit, pasi sulmet ajrore ruse kanë dëmtuar infrastrukturën jetike, shkruan BBC.

Ndërprerjet e rrymës janë gjithashtu në vend për të shmangur mbingarkesat dhe për të lejuar kryerjen e riparimeve.

Rreth 40% e sistemit energjetik të Ukrainës është dëmtuar ose shkatërruar nga sulmet ruse ndaj termocentraleve dhe linjave.

Presidenti Volodymyr Zelensky ka paralajmëruar se Rusia mund të përqendrojë forcat dhe mjetet për një përsëritje të mundshme të sulmeve masive në infrastrukturën energjitike të Ukrainës.

Lufta në Ukrainë ka nisur më 24 shkurt. Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën.