Përse Ferrari Luce ngjalli kaq shumë polemika?

Debutimi i Ferrari Luce, makinës së parë plotësisht elektrike të prodhuar nga Ferrari, një model me katër dyer dhe pesë vende, mund të hyjë në histori jo vetëm për modelin por edhe për reagimin psikologjik dhe financiar që shkaktoi, shkruan focus.it.

Pas prezantimit të modelit, i dizajnuar në bashkëpunim me studion e themeluar nga Jony Ive — dizajneri legjendar pas iPhone dhe Mac — aksionet e Ferrari-t në bursë pësuan një goditje të fortë duke humbur rreth 6%.

Por, mbi të gjitha, një pjesë e fansave më “puristë” të “Cavallino Rampante” reaguan sikur të përballeshin me një… sakrilegj: një Ferrari elektrike, e heshtur, me katër dyer, e menduar edhe për jetën e përditshme. Skandal!

Por si është e mundur që një makinë me mbi 1.000 kuaj fuqi dhe me çmim 550 mijë eurosh  të gjenerojë një reagim kaq visceral?

Përgjigjja nuk gjendet vetëm nën kofano, por në psikologjinë e markave.

Kur një markë ikonike “ndryshon gjuhë” shumë shpejt, publiku nuk gjykon vetëm produktin: gjykon koherencën e identitetit që ajo markë përfaqëson.

Pas Ferrari-t të parë plotësisht elektrike fshihet një arkitekturë krejtësisht e re, e zhvilluar rreth katër motorëve elektrikë të pavarur, baterisë strukturore 800 V dhe një sistemi dinamik të integruar që koordinon tërheqjen, rigjenerimin, drejtimin dhe pezullimet.

Ja aspektet kryesore teknike në detaje.

Arkitektura dhe sistemi elektrik i shtytjes

Ferrari Luce është ndërtuar mbi një platformë të dedikuar, projektuar nga zero për të shfrytëzuar maksimalisht avantazhet e teknologjisë elektrike për sa i përket qendrës së gravitetit, kontrollit të çift-rrotullimit dhe hapësirës së brendshme.

Skema e tërheqjes: katër motorë elektrikë, një për secilën rrotë, me tërheqje integrale elektrike dhe torque vectoring të pavarur në të dy boshtet.

Fuqia maksimale totale: 772 kW, ekuivalente me 1050 kuaj fuqi, në modalitetin Launch Control.
Çift-rrotullimi maksimal në motorë: 990 Nm.
Çift-rrotullimi maksimal në rrota: 11.150 Nm.
Arkitektura elektrike: 800 V, me elektronikë fuqie me efikasitet të lartë dhe inverterë kompaktë.
Boshtet motorike dhe performanca
Sistemi ndahet në dy boshte elektrike të pavarura, secili me nga dy motorë.
Boshti i përparmë
Fuqi prej 210 kW
Çift-rrotullim në motorë prej 280 Nm
Çift-rrotullim në rrota prej 3400 Nm
Motorët e përparmë arrijnë 30.000 rrotullime/minutë
Pesha e boshtit: 65 kg
Boshti i pasmë
Fuqi prej 620 kW
Çift-rrotullim në motorë prej 710 Nm
Çift-rrotullim në rrota prej 7750 Nm
Motorët e pasmë arrijnë 25.500 rrotullime/minutë
Pesha e boshtit: 129 kg
Launch Control
Shfrytëzon një shtesë fuqie nga bateria për të arritur kulmin prej 770 kW, duke mundësuar:
0-100 km/h në 2,5 sekonda
0-200 km/h në 6,8 sekonda
Shpejtësia maksimale: 310 km/h.

Bateria, karikimi dhe autonomia

Bateria është projektuar, testuar dhe prodhuar në Maranello. Ajo nuk është vetëm një komponent energjie, por pjesë integrale e strukturës së makinës.

Kapacitet bruto: 122 kWh
Tension maksimal: 800 V
Konfigurimi: 210 qeliza në seri, të ndara në 15 module me nga 14 qeliza
Tipologjia e qelizave: pouch të bashkëprojektuara me SK on®, me kapacitet 159 Ah, anodë grafiti dhe katodë NMC me përmbajtje të lartë nikeli
Fuqia maksimale e shkarkimit: 830 kW
Karikim i shpejtë: deri në 350 kW në rrymë të vazhduar
Karikim i deklaruar: 70 kWh në 20 minuta me infrastrukturën e duhur
Autonomia e vlerësuar: mbi 530 km
Softueri i kontrollit: VCU, e-Manettino dhe Manettino

Përmasat kryesore

Gjatësia: 5026 mm
Gjerësia: 1999 mm pa pasqyra
Lartësia: 1544 mm
Distanca mes boshteve: 2961 mm
Bagazhi: 597 litra
Gomat e përparme: 265/35 R23
Gomat e pasme: 315/30 R24

Çdo markë e madhe jeton mbi një marrëveshje të heshtur me publikun e saj.

Në rastin e Ferrari-t, ky pakt përbëhet nga shpejtësia, tingulli i motorit, ekskluziviteti, benzina, motorët tradicionalë dhe gara. Luce vë në diskutim tre shtylla të identitetit të “Cavallino Rampante”.

E para është tingulli.

Ferrari pretendon se ka punuar mbi psikoakustikën për të valorizuar dridhjet reale të powertrain-it elektrik, duke shmangur një zhurmë artificiale të thjeshtë.

Por për shumë fansa mungesa e ulërimës së një V8 ose V12 mbetet një humbje simbolike enorme. Nuk është vetëm çështje teknike, por mbi të gjitha emocionale.

E dyta është përdorimi për të cilin është menduar.

Një Ferrari me katër dyer dhe pesë vende, sado ekstrem dhe luksoz, afrohet me idenë e një makine familjare, megjithëse me performancë shumë të lartë.

Është një hap që cenon idenë tradicionale të një makine garash “të huazuar” për rrugën.

E treta ka të bëjë me dizajnin.

Bashkëpunimi me Jony Ive sjell një stil të ri, më të pastër, fluid, pothuajse “digjital”. Për disa është një evolucion natyral i luksit bashkëkohor; për të tjerë është një shkëputje shumë e fortë nga muskulatura emocionale e Motor Valley.

Kur historia përsëritet

Ferrari Luce nuk është rasti i parë ku një markë pothuajse “fetare” akuzohet se ka tradhtuar vetveten. Historia industriale është plot me revolucione që fillimisht janë perceptuar si herezi.

Në vitin 1985, Coca-Cola ndryshoi formulën e saj historike për t’iu përgjigjur avancimit të PepsiCo.

Në testime, receta e re më e ëmbël funksiononte. Por publiku nuk po blinte vetëm një pije: po blinte një pjesë të memories së vet kolektive.

Reagimi ishte shumë i ashpër. Telefonata, letra proteste, indinjatë publike.

Mesazhi ishte i qartë: Coca-Cola mund ta kishte përmirësuar shijen, por kishte shkelur një simbol. Formula origjinale u rikthye shpejt si Coca-Cola Classic.  /atsh