Hoti Gërvallës dhe Sveçlës: “Hallkat” nuk dështojnë vetë, por ata që i drejtojnë

Deputeti i Lidhjes Demokratike të Kosovës, (LDK), Avdullah Hoti, i ka reaguar ministres së Drejtësisë Donika Gërvallës dhe ministrit të Punëve të Brendshme, Xhelal Sveçlës, pas deklarimeve të këtyre të dyve në konferencën e mbajtur sot rreth rastit të vdekjes së Arlinda Zekajt.

Përmes një postimi i Facebook, Hoti u shpreh se “hallkat” nuk dështojnë vetë, por ato dështojnë nga ata që i drejtojnë.

Sipas Hotit, “hallkat” kanë emër, teksa theksoi se llogaridhënia nuk është raport, por është dorëheqje. /Zëri

Postimi i plotë:

Hallkat nuk dështojnë vetë. I dështojnë ata që i drejtojnë.

Gjashtë vjet në pushtet, zoti Sveçla. Gjashtë vjet përgjegjësi për mbrojtjen e grave, zonja Gërvalla.

Arlinda ju dërgoi sinjalet. Ju i latë të kalonin. Dhjetë minuta pas lënies në shtëpi nga organet e rendit, ajo ishte e vdekur.

Sot fshihuni pas “hallkave”. Por hallkat kanë emër. Kanë ministër. Llogaridhënia nuk është raport. Është dorëheqje.