Protesta kundër projektit të investimit në Zvërnec, vijon për të 21-ën ditë radhazi

Qytetarë të shumtë janë mbledhur sërish në Tiranë për të kundërshtuar projektin e investimit në zonën e Zvërnecit, ndërsa protesta ka hyrë në ditën e saj të 21-të.

Tubimi nisi në Sheshin “Skënderbej”, prej nga pjesëmarrësit marshuan përgjatë Bulevardit “Dëshmorët e Kombit”. Ata mbanin pankarta dhe flamuj kombëtarë, ndërsa gjatë marshimit shprehën kundërshtimin e tyre ndaj qeverisë dhe përfaqësuesve të klasës politike. Në protestë morën pjesë edhe shqiptarë të ardhur nga diaspora.

Organizatorët deklarojnë se lëvizja qytetare tashmë është konsoliduar rreth pesë kërkesave kryesore, të cilat i konsiderojnë të panegociueshme:

Dorëheqjen e kryeministrit Edi Rama;
Krijimin e një qeverie teknike;
Shfuqizimin e Ligjit për Zonat e Mbrojtura;
Shfuqizimin e Ligjit për Investimet Strategjike;
Anulimin e plotë të projektit të njohur si “Paketa e Maleve”.

Sipas protestuesve, këto kërkesa përfaqësojnë kushtet bazë për zgjidhjen e situatës dhe mbrojtjen e interesit publik në lidhje me projektin e planifikuar në zonën e Zvërnecit.