Antonio Costa sot në Kosovë – do t’i takojë Haxhiun, Kurtin dhe krerët partiakë

Presidenti i Këshillit Evropian, Antonio Costa, do të jetë sot në Kosovë në kuadër të turneut të tij në Ballkanin Perëndimor.

Costa deri tani ka vizituar Bosnjë dhe Hercegovinën, Tiranën dhe Maqedoninë e Veriut, ndërkaq sot, më 3 qershor, presidenti i Këshillit Evropian do të qëndrojë në Prishtinë.

Ai do të takohet me ushtruesen e detyrës së presidentes Albulena Haxhiu, kryeministrin në largim Albin Kurti, si dhe me kryetarët e partive të tjera.

Takimi me Haxhiun do të mbahet në orën 11:00, ndërkaq me kryeministrin në detyrë Albin Kurtin në orën 11:40.

Costa do t’i takojë edhe kryetarët e partive të tjera.

Turneu i tij do të vazhdojë më 4 qershor në Beograd.

Vizita e presidentit të Këshillit Evropian do të përmbyllet në Mali i Zi, ku presidenti Jakov Milatoviq do të presë liderët rajonalë në një darkë me rastin e 20-vjetorit të rivendosjes së pavarësisë së vendit.

Më 5 qershor, Costa do të bashkëkryesojë Samitin BE–Ballkani Perëndimor, i cili do të zhvillohet nën temën: “Prosperiteti dhe stabiliteti i përbashkët i BE-së dhe Ballkanit Perëndimor”.