Hamza nënshkruan peticionin kombëtar në mbështetje të ish-krerëve të UÇK-së

Kryetari i Partisë Demokratike të Kosovës, Bedri Hamza, ka njoftuar se ka nënshkruar peticionin kombëtar në mbështetje të ish-krerëve të Ushtrisë Çlirimtare të Kosovës, që po gjykohen në Dhomat e Specializuara të Kosovës në Hagë.

Përmes një postimi në Facebook, Hamza tha se është detyrë e secilit të qëndrojë pranë atyre që, sipas tij, kontribuuan për lirinë dhe shtetin e Kosovës.

“Është detyrë e secilit prej nesh që t’u qëndrojë pranë atyre që kontribuuan me vite të tëra për lirinë dhe shtetin tonë. Lufta çlirimtare ishte mbrojtëse, e drejtë dhe jam i bindur se drejtësia së shpejti do ta rikonfirmojë këtë”, shkroi kreu i PDK-së.