Seanca në Hagë, sot fjala përfundimtare e mbrojtjes së Kadri Veselit
Në Dhomat e Specializuara në Hagë sot do të vazhdojë seanca gjyqësore me deklaratat e mbrojtjes së Kadri Veselit, për t’u pasuar më pas nga mbrojtja e Rexhep Selimit.
Dje përfundoi dita e tretë e deklaratave përmbyllëse në procesin gjyqësor ndaj krerëve të UÇK-së.
Gjatë kësaj dite, deklaratat i paraqitën mbrojtja e Hashim Thaçit, përmes avokatëve Luka Mishetiq, Nina Tavakoli dhe Pierre-Richard Prosper, si dhe mbrojtja e Kadri Veselit, e përfaqësuar nga avokati Rodney Dixon.
Dixoni do të vazhdojë edhe sot paraqitjen e mbrojtjes për ish-kryeparlamentarin Kadri Veseli, e cila nisi dje para trupit gjykues, por nuk përfundoi.
Gjatë fjalës së tij, Dixoni theksoi se Zyra e Prokurorit të Specializuar, nuk ka paraqitur prova që dëshmojnë se ish-kryetari i Kuvendit ka qenë i përfshirë në aktivitete kriminale.
