“Anton, a po do me e kthye Serbinë?”, Abdixhiku ironizon me akuzat e LVV-së
Lidhja Demokratike e Kosovës (LDK), ka kritikuar ashpër Qeverinë Kurti për, siç thotë, “gjashtë vite dështime”, duke theksuar se qytetarët po përballen me fatura më të shtrenjta dhe retorikë boshe nacionaliste.
LDK-ja ka thënë se “patriotizmi i tyre fals dhe Serbia që përmendet veç për propagandë, është gjuha e vetme që u ka mbetur”.
Kryetari i partisë, Lumir Abdixhiku duke folur para qytetarëve në Prizren, u është përgjigjur akuzave për të LVV-së për “kthimin” e Serbisë në Kosovë.
Ai shihet teksa i drejtohet Anton Qunit, i cili ishte pjesë e luftës në Koshare me një pyetje ironizuese “Anton a po don ti me kthy Serbinë?”
“Këta i kanë 6 vite në krye të qeverisë dhe rezultatet i keni katastrofale. Çmimet po rriten, rryma, fatura tash ju vjen edhe më e shtrenjtë e atje Vuk Hamoviqi po përfiton miliona pare të Kosovës prej importit të energjisë elektrike, të cilën këta provojnë me fshehë. Edhe dje edhe sot nga 3-4 qind mijë euro në ditë t’i fitojnë. Pra ky është patriotizmi fals i tyre. Për atë arsye, ju lus të mobilizoheni fort, të mobilizoheni fort edhe të tregoni saktë se ku i kemi problemet, si duhet t’i qasemi këtyre problemeve”, shprehet Abdixhiku.
Ai shtoi se populli i Kosovës pret prej LDK-së, madje edhe partitë tjera janë duke prit prej LDK-së.
“Nuk mbet parti në Kosovë që s’thotë po du me LDK-në. Krejt duam me LDK-në. Elektorati i tyre po thotë don me LDK-në. Nëse po doni kaq shumë me LDK-në, votoni LDK-në”, u shpreh Abdixhiku.
