Haradinaj: Largimi i sanksioneve nga ana e BE-së ndaj Kosovës do t’u hapte rrugë proceseve integruese

Kryetari i Aleancës për Ardhmërinë e Kosovës, Ramush Haradinaj, në Ditën e Evropës, ka thënë se qytetarët e Kosovës e meritojnë integrimin e plotë në strukturat euroatlantike.

Haradinaj tha se në këtë ditë duhet theksuar nevojën për largimin e sanksioneve nga ana e BE-së ndaj Kosovës.

“Kosova tash e dy dekada është e përkushtuar në synimin e saj për të qenë pjesë e familjes evropiane. Qytetarët e Kosovës e meritojnë integrimin e plotë në strukturat euroatlantike. Ky është një synim për të cilin jemi përcaktuar si shtet, të orientuar për të kontribuuar në prosperitetin, paqen, sigurinë, dhe drejtësinë e kontinentit tonë, përkrah shteteve tjera të Evropës”, shkroi Haradinaj.

“Në këtë ditë theksohet nevoja për largimin e sanksioneve nga ana e BE-së ndaj Kosovës, për t’u hapur rrugë zhvillimit dhe proceseve integruese evropiane, veçanërisht anëtarësimit në Këshillin e Evropës. Urime Dita e Evropës!”, përfundoi Haradinaj në profilin e tij zyrtar në Facebook. /Zëri