KESCO: Çmimet e energjisë elektrike në Kosovë, më të lirat në rajon dhe Evropë
Sipas Zyrës së Statistikave të Komisionit Evropian (EURSTAT), Kosova kishte bindshëm çmimet më të lira të energjisë elektrike në Evropë për vitin 2022, kur edhe janë bërë matjet e fundit vjetore.
Çmimet mesatare për shpenzimin mesatar të konsumit janë 6 centë për kilovat/orë, që është afro 25 për qind më lirë se e dyta më e lira, që është Serbia me çmim 7 centë për kilovat/orë. Shqipëria, Bosnjë e Hercegovina dhe Mali i Zi kanë çmimet nga 8 centë për kilovat/orë, ose më tepër se 35 për qind më shtrenjtë se në Kosovë. Maqedonia e Veriut është edhe më e shtrenjtë, duke shënuar çmimi prej 10 centë për kilovat/orë, që i bie afro 70 për qind më shtrenjtë se Kosova.
Në këto matje janë të përfshirë vetëm konsumatorët e përmasave të mesme me një konsum vjetor prej 2500 kWh deri në 4999 kWh.
Të gjitha vendet e BE-së kanë çmime së paku dyfish më të larta se Kosova. Vendi më i populluar i BE-së, Gjermania, ka një çmim prej 28 centësh për kilovat/orë, ose 4.75 herë më tepër se në Kosovë.
Ndërkohë, Danimarka, Belgjika dhe Italia janë tri vendet e Bashkimit Evropian, të cilat vazhdojnë të paguajnë çmimin më të lartë për energji elektrike, bazuar në të dhënat e EUROSTAT-it për gjashtëmujorin e dytë të vitit 2022. Kurse sa i përket rajonit, çmimet më të larta të energjisë elektrike për konsumatorët shtëpiakë i kanë Romania, Greqia dhe Kroacia.
Sipas EUROSTAT-it, në Danimarkë 1 kilovat/orë energji elektrike kushton mesatarisht 47 centë, në Belgjikë 42 centë, kurse në Itali çmimi arrin në 33 centë.
Në Kosovë, çmimi për kilovat/orë është 6 centë, që i bie se është gati pesëfish më i ulët se në Romani, ku 1 kilovat/orë kushton 29 centë.
Çmimet në Evropë:
Kosova - 0.06 € kWh
Serbia - 0.07 € kWh
Bosnjë dhe Hercegovina - 0.08 € kWh
Shqipëria - 0.08 € kWh
Mali i Zi - 0.08 € kWh
Hungaria - 0.09 € kWh
Bullgaria - 0.10 € kWh
Maqedonia e Veriut - 0.10 € kWh
Malta - 0.12 € kWh
Holanda - 0.12 € kWh
Islanda - 0.12 € kWh
Kroacia - 0.13 € kWh
Polonia - 0.15 € kWh
Sllovakia - 0.16 € kWh
Sllovenia - 0.17 € kWh
Portugalia - 0.19 € kWh
Finlanda - 0.19 € kWh
Norvegjia - 0.19 € kWh
Luksemburgu - 0.19 € kWh
Franca - 0.19 € kWh
Austria - 0.20 € kWh
Moldova - 0.20 € kWh
Lituania - 0.20 € kWh
Suedia - 0.20 € kWh
Lihtenshtajn - 0.22 € kWh
Estonia - 0.22 € kWh
Greqia - 0.23 € kWh
Latvia - 0.25 € kWh
Qiproja - 0.28 € kWh
Gjermania - 0.28 € kWh
Romania - 0.29 € kWh
Irlanda - 0.30 € kWh
Çekia - 0.31 € kWh
Spanja - 0.32 € kWh
Italia - 0.33 € kWh
Belgjika - 0.42 € kWh
Danimarka - 0.47 € kWh.
