Flamuri i Kosovës ulet në gjysmështizë për nder të viktimave nga aksidenti në Kroaci

Flamuri i Republikës së Kosovës është ulur në gjysmështizë pas aksidentit tragjik që ndodhi të dielën në Kroaci, ku mbetën të vdekur 10 persona dhe dhjetëra të tjerë u lënduan.

Për nderim të viktimave të aksidentit që tronditi vendin, presidentja e Kosovës Vjosa Osmani ka shpallur këtë të hëne ditë zie.

Të dielën rrugën për në Kroaci mori kryeministri i Kosovës Albin Kurti, bashkë me disa nga ministrat e kabinetit të tij.

Ai vizitoi të lënduarit, të cilët po trajtoheshin në spitalin në Slavonski Brod.

Ndërsa mëngjesin e kësaj të hëne ministrja e Punëve të Jashtme dhe Diasporës (MPJD), Donika Gërvalla, ka treguar se dy nga personat e lënduar gjenden në mjekim intensiv e që njëri nga ta është në gjendje më stabile.

E dhjetë qirinj që simbolizojnë dhjetë jetët e humbura në aksidentin në Kroaci u ndezën pranë Teatrit Kombëtar në sheshin “Skënderbeu” në Prishtinë mbrëmjen e së dielës.