“Krejt dhe Drejt” – sllogani i Kurtit dhe Osmanit për zgjedhjet e 14 shkurtit
I pari i Lëvizjes Vetëvendosje, njëherësh kandidati për kryeministër, Albin Kurti bashkë me Vjosa Osmanin, kandidaten për presidente, kanë bërë publik slloganin për zgjedhjet e 14 shkurtit.
“Krejt dhe Drejt” është sllogani me të cilin do të garojë LVV-ja në këto zgjedhje, ndonëse sipas të gjitha gjasave, pa Kurtin në listë.
Sllogani u e bë i ditur nga Kurti dhe Osmani përmes rrjeteve sociale.
Ushtruesja e detyrës së presidentes, tregoi arsyet se pse ky slogan sipas tyre është i duhuri.
“Krejt, sepse fryma mobilizuese është me shumicën, sepse ata e bëjnë dallimin!
Krejt, sepse vetëm shumica mund t’i bëjë ndryshimet. Krejt, sepse sa herë që jemi bërë bashkë, kemi dalë fitues. Drejt, sepse vetëm në këtë mënyrë e krijojmë diferencën. Drejt, sepse vetëm me drejtësi garantohet përfaqësimi i barabartë qytetar. Drejt, sepse i drejti gjithmonë del fitues”, shkruan Osmani.
Në postimin e tij në lidhje me këtë sllogan, Kurti tha:
“Referendumi që do ta kthejë Kosovën kah e mbara, nuk mund të ndalet”, shkruan ish-kryeminisitri i Kosovës. /Zëri