Nesër Thaçi pranon letrat kredenciale të ambasadorit të ri të SHBA-së

Presidenti i Kosovës, Hashim Thaçi nesër do të pranojë letrat kredenciale të ambasadorit të ri të SHB-së në Kosovë, Philip Kosnett.

Pranimi i tyre do të bëhet në ora 14:50 në Kabinetin e Presidentit, me c’rast do të ketë deklarata për media.

Kosnett do të zëvendësojë ambasadorin e deri tanishëm Greg Delawie.

Ndryshe, ambasada e SHBA-së në Prishtinë ditë më parë ka publikuar edhe biografinë e ambasadorit të ri.

Postimi i Ambasadës:

Përshëndetje, unë jam Philip Kosnett.

Para pesëmbëdhjetë viteve kam shërbyer në misionin diplomatik të SHBA-ve në Prishtinë. Tani kam nderin të kthehem si ambasador për të ndihmuar në forcimin e miqësisë së ngushtë midis dy shteteve tona të mrekullueshme.

Bashkëshortja ime, Alison, dhe unë, presim të eksplorojmë vendin dhe të krijojmë miq të rinj nga të gjitha bashkësitë.

Dëshirojmë të dëgjojmë idetë tuaja lidhur me atë se si Kosova dhe Amerika mund të punojnë së bashku në shumë fusha: biznes, sundim të ligjit, siguri, arsim, dhe më shumë.

Gjatë qëndrimit tonë këtu Alisoni dhe unë po ashtu shpresojmë të diskutojmë për përvojën e të jetuarit në një shoqëri multikulturore, multietnike, dhe diverse nga aspekti fetar – diçka që është e përbashkët për dy vendet tona.

Diversiteti mund të na pasurojë kulturalisht dhe të frymëzojë zgjidhje inovative për problemet nacionale.

Dhe unë besoj se bashkësitë dhe individët duhet që sinqerisht të kenë parasysh të kaluarën e tyre për të ndërtuar një të ardhme të ndritur së bashku.

Askush nuk e kuptoi këtë më mirë së aktivistja amerikane për të drejtat civile, Ida Wells, fjalët e së cilës janë të shënuara në murin e Muzeut Kombëtar të Kulturës dhe Historisë Afrikano-Amerikane në Washington, D.C.:  “Mënyra për të korrigjuar gabimet është duke ndezur dritën e së vërtetës mbi to”.

Shpresoj të shihemi së shpejti! Faleminderit që shikuat.

Faleminderit.