Ky është paralajmërimi i veteranëve të Dukagjinit pas publikimit të listave për veteranët e rrejshëm

Ky është paralajmërimi i veteranëve të Dukagjinit pas publikimit të listave për veteranët e rrejshëm

Aktuale shtator 17, 2018 - 10:55
Ja çfarë paralajmërojnë veteranët e Dukagjinit

Organizata e Veteranëve të Luftës së UÇK-së, degët e Dukagjinit, ka reaguar pas publikimit të emrave për veteranët ‘mashtrues’, duke  u shprehur se aktakuza dhe emrat që u publikuan, tregojnë se sa qesharake e joprofesionale është puna e Prokurorisë.

Organizata e Veteranëve të Luftës së UÇK-së, e cila përfshinë Deçanin, Pejën, Gjakovën dhe Istogun, nëpërmjet një komunikate është shprehur se edhe 19 vite pas përfundimit të luftës, luftëtarëve të lirisë assesi tu ndalet persekutimi.

“Gjahu i shtrigave, që filloi menjëherë pas luftës nga misionet ndërkombëtare, tani po vazhdon nga faktorët vendorë: Prokuroria Speciale e Kosovës dhe mediat. Aktakuzën dhe emrat që u publikuan, tregojnë se sa qesharake e joprofesionale është puna e Prokurorisë, e gjithashtu sa joprofesionale dhe tendencioze është paraqitja e gjithë kësaj nga mediat elektronike e të shkruara.  Sa i përket ZO të Dukagjinit, përfshirja në listë e pothuajse shumicës së luftëtarëve më të dalluar, tregon se kjo listë është vetëm një fabrikim, në vazhdën e luftës speciale kundër Ushtrisë Çlirimtare të Kosovës. Pa asnjë fije turpi, duke mos shikuar se a lëndojnë ndjenjat e luftëtarëve, paraqitja në disa media e veteranëve të luftës, që sakrifikuan më së shumti për lirinë tonë, si “veteran mashtrues”, përpos që është manipulim me qytetarët, është ofendimi më i rëndë për të gjithë luftëtarët e Ushtrisë Çlirimtare të Kosovës, të cilët me aktivitetin e tyre, mundësuan krijimin e shtetit demokratik dhe lirinë e shprehjes”, bëhet e ditur në komunikatë, duke shtuar se janë shokuar, kur kanë parë që informacione të tilla, sipas kësaj organizate, të supozuara e fabrikuara, shndërroheshin në shifra se gjoja luftëtarët e paskan dëmtuar buxhetin e shtetit.

“Nga e tërë kjo, konstatojmë se kjo aktakuzë dhe mënyra e paraqitjes së saj në opinion është vetëm një cirk, të cilit do t’i përgjigjemi me mijëra padi, si për ish prokurorin, ashtu edhe për disa media që lënduan ndjenjat tona dhe luajtën me dinjitetin e integritetin tonë si luftëtarë. Lufta Çlirimtare dhe largimi me pushkë i okupatorit, është e arritura jonë jetësore. Ne kërkojmë urgjentisht, që Ligji për Mbrojtjen e Vlerave të Luftës, të kalojë sa më shpejt në Parlamentin e Kosovës, që këto dukuri të mos shfaqen më në të ardhmen”, bëhet e ditur më tutje në komunikatë.

OVL e UÇK-së, degët në Deçan, Pejë, Gjakovë dhe Istog, edhe njëherë kërkojnë ndaljen e kësaj tendence të rrezikshme e antihistorike kundër Luftës Çlirimtare, pasi që pasojat mund të jenë të paparashikueshme.