Mekaj: Më arrestuan si hakmarrje politike ndaj Fatmir Limajt

Sali Mekaj, ish-kryetar i Gjykatës së Apelit, në një intervistë ekskluzive për gazetën “Zëri” thotë se arrestimi i tij dhe më pas gjykimi prej më shumë se dy vjetësh ka qenë i ndikuar politikisht

Dy ditë pas shpalljes i pafajshëm nga Gjykata Themelore në Prishtinë për veprën penale “Ushtrimi i ndikimit” për rastin e fajdeve, ish- kreu i Gjykatës së Apelit Sali Mekaj gjatë një interviste për gazetën “Zëri” ka thënë se arrestimi i tij ka qenë një spektakël.

Mekaj thotë se një hetues i Antidrogës i kishte thënë se ka dëshirë që ta arrestojë dhe një gjë të tillë e ka bërë.

LEXO EDHE: Koordinatorë për harxhimin e buxhetit

Madje ish-kreu i Gjykatës së Apelit arrestimin e tij e ndërlidh edhe me hakmarrje politike.

Sipas tij, me rastin e ndërrimit të trupit gjykues kundër Fatmir Limajt, tashmë zëvendëskryeministër i Kosovës e në atë kohë lider i partisë opozitare, struktura e atëhershme politike ishte hakmarrë ndaj tij, siç thotë ai, duke ia montuar rastin.

“Unë kam vendosur për përjashtimin e kolegjit që ka qenë i caktuar në Gjykatën e Apelit për vendosjen e rastit ‘Limaj’. E kam ndërruar atë kolegj, kanë qenë dy gjyqtarë ndërkombëtarë dhe një vendor. E kam ndryshuar për arsye krejt objektive, krejt ligjore dhe ajo dikujt nuk i ka konvenuar”, ka thënë mes të tjerash Mekaj në intervistën për “Zërin”.

Zër: Në korrik të vitit 2015 jeni arrestuar nën dyshimin për “Keqpërdorim të pozitës zyrtare” me pretendimet se kishit pranuar një ryshfet në vlerë prej 20 mijë eurosh. Nga pozita e të parit të Gjykatës së Apelit ju jeni arrestuar, jeni paraburgosur dhe jeni përballur me një proces gjyqësor gati trevjeçar. Sa ka ndikuar arrestimi juaj në humbjen e besimit në gjyqësor?

Mekaj: Arrestimet e paarsyeshme dhe të padrejta nuk e dëmtojnë as besimin dhe as imazhin e gjyqësorit, por janë strukturat e drejtësisë që duhet të mendojnë për fillimin e proceseve gjyqësore pasi të kenë prova, argumente dhe pasi të kenë siguruar së paku minimumin e asaj që tregon për një dyshim të arsyeshëm se një person ka kryer vepër penale. Unë mendoj se arrestimi si arrestim sigurisht nuk ka ndihmuar në përmirësimin e besimit, por tash pas 3 vjetësh do të shihet se nuk jam unë ai që e kam dëmtuar imazhin e gjyqësorit, por janë organet e ndjekjes që e kanë filluar këtë proces, për të cilin prej fillimit është ditur se do të jetë i dështuar.

Zëri: Të hënën jeni shpallur i pafajshëm nga Gjykata Themelore në Prishtinë, si e keni pritur këtë vendim?

Mekaj: T’jua them të drejtën, e kam pritur gjithmonë këtë vendim. Ka qenë për mua shqetësues fakti i zvarritjes, fillimisht i hetimit, por edhe i zvarritjes së procesit gjyqësor për më se dy vjet. Ju e dini se lëndët e natyrës së korrupsionit janë lëndë të natyrës urgjente dhe me strategjinë e Këshillit Gjyqësor janë përcaktuar si të tilla dhe mendoj se mund të përshpejtohet kjo procedurë që të mos shkojnë bash dy vjet, por e kuptoj ngarkesën që ka sidomos Gjykata Themelore në Prishtinë me lëndë të shumta dhe në një mënyrë ky mund të jetë një lloj justifikimi, edhe pse jo i plotë.

Zëri: Rasti juaj është mbajtur larg syve të medieve, a ka qenë kjo me kërkesën tuaj apo vetë Gjykata ka vendosur?

Mekaj: Procesi ka qenë i mbyllur prej fillimit, fillimisht Prokuroria ka filluar hetimet dhe i ka mbajtur të mbyllura, ka sjellë aktvendim për mbylljen e hetimit, edhe pse i ka mbajtur të mbyllura vetëm për të akuzuarit dhe mbrojtësit, por jo edhe për opinionin, d.m.th. gazetat, mediet kanë mundur të marrin çfarëdo informacioni dhe janë publikuar ato. Vendimi i Gjykatës për mbylljen e seancave gjyqësore ka qenë me kërkesë të të akuzuarve të tjerë, jo me kërkesën time, është pajtuar edhe prokurori, ka qenë një vendim krejt i ligjshëm dhe i arsyeshëm për natyrën e procesit që është zhvilluar, nuk ka pasur asnjë lloj konspiracioni brenda sallës së gjykimit gjatë gjithë kësaj kohe, por kanë qenë çështje private, çështje që Gjykata ka vlerësuar që nuk duhet të bëhen publike për opinionin.

Jam përpjekur ta zgjidh konfliktin për një borxh familjar

Zëri: Jeni akuzuar se keni ndërhyrë në një rast dhe për këtë keni pranuar ryshfet. A keni ndërhyrë ndonjëherë në ndonjë lëndë, qoftë në kohën kur ishit në Gjykatën e Qarkut në Pejë apo edhe në Apel?

Mekaj: Nuk jam akuzuar asnjëherë për pranim të ryshfetit e as për ryshfet, jam hetuar fillimisht për dy vepra penale, për “Shpërdorim të detyrës zyrtare” dhe veprën penale “Ushtrim i ndikimit”. Gjatë zhvillimit të procedurës së hetimit vepra penale “Ushtrim i ndikimit” ka rënë. Prokurori kur ka ngritur akuzë, ka ngritur për dy vepra penale: të “Shpërdorimit të detyrës zyrtare”, por jo edhe për “Ushtrim të ndikimit”, që do të thotë se kanë pushuar hetimet. Me këto dy vepra penale është ngritur akuza, njëra prej tyre është hedhur poshtë me aktvendim të Gjykatës Themelore, e cila pastaj është vërtetuar me vendim të Gjykatës së Apelit dhe në fund Prokuroria ka paraqitur një kërkesë për mbrojtje të ligjshmërisë në Gjykatën Supreme dhe ajo ka vërtetuar gjithashtu se nuk ka vepër penale. Sa i përket çështjes së një borxhi ose fajdeve që i kanë thënë gazetarët, ka qenë një borxh familjar, për të cilin unë përmes disa njerëzve me autoritet jam përpjekur ta zgjidh një konflikt në mes të një familjari tim dhe një personi, që pretendojmë edhe sot që i ka borxh.

Zëri: Ishte raportuar se në momentin e arrestimit ishit kapur në vepër. A mund të na thoni ju lutem se ku ishit në momentin kur u arrestuat?

Mekaj: Unë kam qenë në zyrën time, ka qenë përfundimi i orarit të punës. Jam arrestuar me urdhër të prokurorit të Prokurorisë Speciale, arsyeja e arrestimit ka qenë dyshimi se unë kam marrë një shumë të konsiderueshme të hollash, mirëpo që në natën e parë kur prokurorja e ka intervistuar të akuzuarën, ndoshta s’është e nevojshme t’ia përmend emrin, është vërtetuar se ato të holla janë gjetur në shtëpinë e saj, kanë qenë në shtëpinë e saj, unë s’kam pasur asnjë lloj informacioni, për herë të parë kam dëgjuar nga Policia se bëhet fjalë për një shumë të hollash, diku rreth 20 mijë, të cilat janë gjetur në shtëpinë e saj, ajo ka treguar se i ka në shtëpi dhe kjo është e tëra.

Zëri: Nëse ju jeni i pafajshëm dhe gjithë ky proces ishte vetëm një spekulim ndaj jush, pse mendoni se pikërisht juve ju ndodhi kjo?

Mekaj: Unë nuk dua të spekuloj me prapavijat, dua t’ju them veç një gjë, në momentin që jam arrestuar njëri prej hetuesve më ka thënë se ka pasur shumë dëshirë të më arrestojë dhe thotë se kam ngulur këmbë për të qenë i arrestuar, edhe pse kam pasur rezistencë nga kolegët tuaj, por thotë kjo ka qenë dëshirë imja dhe unë nuk e di prej kujt është motivuar ai për ta pasur gjithë atë dëshirë për të më arrestuar dhe cila është arsyeja?

Zëri: A mund të na tregoni emrin e këtij hetuesi?

Mekaj: Aziz Osmani, nga Antidroga.

Prokuroria duhet të këndellet

Zëri: Ju nuk jeni zyrtari i vetëm që jeni përballur me akuza e me procese të gjata gjyqësore dhe në fund jeni shpallur i pafajshëm. Çfarë mendoni për rastet e tilla, që nuk janë të rralla në Kosovë?

Mekaj: Unë mendoj se duhet rishikuar se çfarë po ndodh në këtë drejtim me arrestimin e personave, për të cilët Gjykata po vërteton vazhdimisht se nuk ka prova, nuk ka vepra penale dhe mendoj se është momenti i fundit, koha e fundit që të këndellet Prokuroria Speciale, Hetuesia dhe të gjitha strukturat që ndërmarrin ndjekjen e personave për të cilët  që në fillim dihet se do të përfundojnë me aktgjykime liruese. Është një lloj denigrimi ndaj personave te të cilët ndodh kjo. Ju e dini që nuk është hera e parë që po fillon me mua dhe për fat të keq as s’do përfundojë me mua, por ka qenë dëshirë e dikujt që të bëjnë këso lloj spektaklesh, kanë bërë kështu edhe me guvernatorin e Bankës, kanë bërë me shumë persona, me ministrin e Transportit Fatmir Limajn. Të gjitha procese të dështuara, arsyen se pse ndodhin këto arrestime duhet ta kërkoni te ata që urdhërojnë arrestime të tilla.

Zëri: A mendoni se prokurorët nuk dinë t’i mbrojnë aktakuzat që i ngrenë, apo është çështja që pikërisht nga fillimi këto raste janë të montuara?

Mekaj: Unë mendoj se ka mungesë të profesionalizmit. Më vjen keq të them për kolegët e mi që janë edhe gjyqtarë, por ka mungesë të profesionalizmit edhe te prokurorët, edhe të gjyqtarët. Unë dua t’u kërkoj falje të gjithë atyre prokurorëve dhe gjyqtarëve që punojnë me përkushtim, që janë profesionistë dhe objektivë, mirëpo për fat të keq nuk janë të gjithë.

Zëri: A besoni në pavarësinë e institucioneve të drejtësisë, pjesë e së cilës keni qenë edhe vetë deri në momentin e aktakuzës ndaj jush?

Mekaj: Unë mendoj se sistemi i drejtësisë është më së paku i ndikuar, është segmenti i Hetuesisë dhe deri diku i Prokurorisë që janë të ndikuara dhe këtë ndikim ju keni mundur ta shihni prej rastit kur presidenti i shkroi katër letra prokurorit të Shtetit që të fillojë hetime të caktuara dhe për bindjen time ai ka qenë një sinjal që deri më tash s’ke pasur kompetencë për t’i filluar këto hetime, mirëpo prej tash e ke dritën e gjelbër dhe fillo. Kështu ka ndodhur edhe tash me një kërkesë të kryeministrit që ia drejtoi prokurorit për një hetim të caktuar. Unë mendoj se struktura e gjyqësorit është një prej institucioneve që është më së paku e varur prej politikës dhe këtu mund të bëj përjashtim individë të caktuar, mund të ketë që janë të ndikuar, mund të ketë që janë në presion të interesave të ndryshme, por gjyqësori ka ruajtur me një masë të caktuar pavarësinë e paanësinë dhe nuk është për t’u kritikuar në atë drejtim aq sa flitet në medie.

Zër: Nëse tashmë Hetuesia dhe Prokuroria i kanë pasur fajet në rastin tuaj, atëherë pse Gjykata nuk e ka rrëzuar aktakuzën kur nuk ka pasur prova, por është dashur të mbahet një proces gjyqësor kaq i gjatë për të ardhur deri te pafajësia juaj?

Mekaj: Po qe se i shihni të gjitha vendimet e gjykatave, është edhe një vendim i Gjykatës Supreme, e cila ka vendosur lidhur me masën e arrestit shtëpiak dhe aty nuk thuhet se ekziston dyshimi i bazuar, por thotë se le të vërtetohet se a ekziston vendimi i bazuar ose nuk ekziston. Në të gjitha vendimet ka qenë kjo rezervë, mirëpo ka një lloj loje e cila bëhet edhe në gjyqësor që nuk duan ta marrin përgjegjësinë direkt gjyqtari konkret, por thotë derisa unë jam ballafaquar me këtë problem ta lë një test, t’ia lë instancës tjetër që ajo të merret me këtë dhe kjo ka ndodhur kështu.

Zëri: A mendoi se këto raste siç është rasti juaj, pastaj rasti i Enver Hasanit po përdoren për të thënë se po luftohet korrupsioni?

Mekaj: T’ua them një fjalë të popullit “Tu e pa lisin nuk po e shohin malin”. Ka korrupsion gjithandej, në gjitha strukturat dhe sistemi i drejtësisë është sistemi më së paku i korruptuar. Nëse duan ta luftojnë korrupsionin duhet filluar nga ata që dihet sheshazi të cilët i kanë bërë milionat, kanë bërë kapitale përrallore për një periudhë 18-vjeçare dhe aty duhet kërkuar. Unë dua të them një gjë se nuk ke sot gjyqtarë të pasur, gjyqtarë që janë mëkëmbur prej punës si gjyqtarë, ka dikush që ka pasuri familjare, por unë për vete po ju them se më i varfër kam dalë nga sistemi gjyqësor sesa kam hyrë.

Zëri: A besoni që aktgjykimi i shkallës së parë për pafajësinë tuaj do të vërtetohet edhe nga Gjykata e Apelit?

Mekaj: Këtu ka ndodhur një paradoks që nuk do të duhej t’i ndodhë një prokurori, i cili pretendon se është profesionist. Prokuroria gjatë hetimit e ka pushuar hetimin për veprën penale “Ushtrimi i ndikimit”, në seancën e shqyrtimit gjyqësor unë kam qenë i akuzuar për një vepër penale pasi një vepër ka rënë është shuar akuza para se të vijë në shqyrtimin gjyqësor dhe jam akuzuar përfundimisht për veprën penale “Shpërdorim i detyrës zyrtare”. Në fjalën përfundimtare përfaqësuesja e akuzës e ka ndryshuar aktakuzën, ka hequr dorë  prej veprës penale “Shpërdorim i detyrës zyrtare” dhe i është kthyer veprës penale për të cilën kanë pushuar hetimet. Ky është një paradoks që ka ndodhur dhe unë mendoj se Gjykata e Apelit do..., nuk kam qejf të flas çfarë do të jetë epilogu, por do ta ketë thjesht një çështje procedurale për të vendosur se a ka pasur të drejtë prokurori ta ndryshojë akuzën për një vepër penale të cilën e ka hedhur, prandaj unë besoj se vendimi i Gjykatës së Apelit do të jetë gjithsesi i drejtë dhe i bazuar në ligj.

Jam persekutuar unë dhe familja

Zëri: Sa do të ishte shifra të cilën ju do të kërkonit si kompensim për humbjen e reputacionit, qëndrimit tuaj në paraburgim dhe persekutimi që ju është bërë gjatë kësaj periudhe të përballjes suaj me këtë rast?

Mekaj: Natyrisht sepse është një persekutim jo vetëm imi, por edhe i gjithë familjes. Kemi pasur një vuajtje të jashtëzakonshme sepse kur bën një veprim të kundërligjshëm edhe pajtohesh moralisht se do të vijë një pasojë je i përgatitur edhe psikikisht, por kur prej fillimit dihet se nuk ka asnjë bazë për dyshim, për çfarëdo veprimi të kundërligjshëm, atëherë normalisht që vuan gjithë jetën ose sa ka zgjatur kjo procedurë. Kjo është një plagë që nuk harrohet.

Zëri: Do të kërkoni kompensim?

Mekaj: Patjetër.

Zëri: A keni menduar sa do të jetë shuma që do ta kërkoni?

Mekaj: Jo absolutisht, jo. Në fund të fundit edhe po të mos marrë kompensim sigurisht do të kërkoj që Gjykata ta vendosë një lloj rehabilitimi timin moral.

Zëri: Pasi procesi ndaj jush të marrë formën e prerë dhe ju përfundimisht të përmbyllni punë me organet e drejtësisë a pretendoni sërish të futeni në sistemin e drejtësisë dhe a do të ktheheshit sërish në Gjykatën e Apelit aty ku ishit deri para këtij procesi?

Mekaj: Unë e kam përfunduar karrierën time, jam pensionuar para dy javësh, kështu që nuk pretendoj. Edhe ashtu kam dashur ta përfundoj mandatin që e kam pasur dhe të dal nga gjyqësori. Është një punë shumë e lodhur për ata që e bëjnë me përkushtim, është një punë që shteron njeriun.

Zëri: Kush mendoni se qëndron prapa gjithë procesit tuaj?

Mekaj: Unë thashë që nuk kam dëshirë të spekuloj. Unë e di që motivi mund të jetë lidhur me lëndën e Fatmir Limajt, por për këtë do të flas njëherë tjetër, nuk është momenti.

Zëri: Për cilin rast të Limajt e keni fjalën?

Mekaj: Rasti “Limaj” për krime të luftës, për të cilin ka qenë i liruar, jo ky i fundit por ka pasur edhe një rast më përpara. Besoj aty është gjeneza dhe prej aty kanë filluar disa sulme indirekte në personalitetin tim dhe kjo kulmoi me këtë.

Zëri: Keni pasur ndonjë kërcënim direkt prej dikujt ose indirekt për këtë rast?

Mekaj: Dua t’u them diçka. Unë asnjëherë nuk kam pasur kërcënime prej njerëzve seriozë, kam pasur ndonjë kërcënim aty-këtu prej personave që i kam gjykuar në proceset e caktuar penale, mund të mos e besoni por asnjëherë nuk kam pasur asnjë ndikim prej asnjë strukture politike dhe prej asnjë individi që është në politikë, me përjashtim të kërkesave të palëve që gjithmonë kanë interesim për ndonjë lëndë. Më është drejtuar qoftë në cilësi të gjyqtarit ose të kryetarit për përshpejtim të procedurës ose të vendosjes së drejtë... në këtë kuptim.

Zëri: E pse pikërisht te rasti “Limaj” po dyshoni që ka nisur gjithë kjo?

Mekaj: Prej atëherë e kam vërejtur. Unë kam vendosur për përjashtimin e kolegjit që ka qenë i caktuar në Gjykatën e Apelit për vendosjen e rastit “Limaj”, e kam ndërruar atë kolegj, kanë qenë dy gjyqtarë ndërkombëtarë dhe një vendor, e kam ndryshuar për arsye krejt objektive, krejt ligjore dhe ajo dikujt nuk i ka konvenuar.

Zëri: Por ju ka thënë dikush juve ndonjëherë diçka se për këtë rast bëhet fjalë?

Mekaj: Ju lutem dua të rezervohem, e kam ndërmend të flas për këtë rast në detale. Është një çështje mjaft e ndjeshme. Mua s’ma ka thënë kurrë askush direkt, por unë kam pasur indikacione se diçka s’po shkon mirë në raport timin me politikën.