Hoti: Së pari zgjedhje, pastaj dialog

Shefi i Grupit Parlamentar të Lidhjes Demokratike të Kosovës, Avdullah Hoti përmes një postimi në “Facebook”, ka kërkuar që fillimisht vendi të shkojë në zgjedhje e pastaj të zhvillohet dialogu mes Kosovës dhe Serbisë, raporton “Zëri.info”.

Tutje ai ka thënë që nuk mund të diskutohet për normalizim të raporteve me Serbinë ku në Kosovë nuk ka normalitet të brendshëm.

LEXO EDHE: Hiqet nga rendi i ditës rezoluta për dialogun me Serbinë

“Së pari zgjedhje, pastaj dialog - projekt që prodhon stabilitet institucional dhe eviton rreziqet gjeopolitike që po i kanosen Kosovës. Nuk mund të pretendojmë t’i normalizojmë raportet me Serbinë, e në të njëjtën kohë të kemi raporte jo normale institucionale brenda në Kosovë. Gjendja aktuale në Kosovë nuk po prodhon normalitet të brendshëm, e as zhvillim në asnjë segment të jetës. Përkundrazi. Së pari zgjedhje, pastaj dialog - është renditja e veprimeve politike që normalizon gjendjen politike dhe siguron stabilitetin institucional në Kosovë, si dhe krijon parakushtet për arritje të marrëveshjes dhe normalizim të marrëdhënieve me Serbinë. Për më tepër, nuk mund të vazhdohet rrugëtimi normal i Kosovës drejt BE-së kur situata e krijuar në Kosovë, e krijuar me angazhimin anti kushtetues të Presidentit Thaçi për korrigjimin e kufijve, e ka nxjerrë nga binarët këtë rrugëtim. Kjo situatë e rrezikshme gjeopolitike për Kosovën mund të riparohet vetëm përmes zgjedhjeve të reja. LDK-ja nuk do të ndalet në këtë përpjekje për të bindur të gjitha forcat politike për projektin “Së pari zgjedhje, pastaj dialog”, ka thënë Hoti. /ZËRI