Hamza: Në vitin 2025 po hyjmë me shpresë e besim se do ta ndërtojmë një Kosovë më të mirë
Kandidati për kryeministër i PDK-së, Bedri Hamza, ua ka uruar qytetarëve Vitin e Ri 2025 përmes një videoje, ku shihet familja e tij duke rregulluar bredhin dhe duke u bërë gati për festën e fundvitit.
Hamza ka thënë se viti 2024 po i numëron orët e fundit, por rrugëtimi me të sapo ka filluar.
Ai ka thënë se në vitin 2025 po hyjmë me shpresë, besim dhe optimizëm se do ta ndërtojmë një të ardhme më të mirë, sepse Kosova mundet më mirë.
“Përgatitjet janë po aq të veçanta sa vetë festa e Vitit të Ri. Dekorimet e bredhit, pjekja e ëmbëlsirave, mbështjellja e dhuratave dhe ngrohtësia familjare i mbushin zemrat dhe shtëpitë tona plot me gëzim.
Viti 2024 po i numëron orët e fundit, por rrugëtimi ynë sapo ka filluar. Në vitin 2025 po hyjmë me shpresë, besim dhe optimizëm se do ta ndërtojmë një të ardhme më të mirë, sepse Kosova mundet më mirë.
Nga familja jonë, gëzuar Vitin e Ri juve dhe familjeve tuaja!”, shkroi Hamza, duke publikuar edhe një video në Facebook.
