Supremja hedh poshtë ankesën e Vetëvendosjes kundër PZAP-it, urdhëron KQZ-në ta certifikojë Listën Serbe
Gjykata Supreme e Kosovës ka dalë me aktvendim, duke e hedhur poshtë si të palejuar ankesën e Lëvizjes Vetëvendosje që e paraqiti kundër vendimit të Panelit Zgjedhor për Ankesa dhe Parashtresa lidhur me certifikimin e Listës Serbe për zgjedhjet parlamentare.
Lajmin për gazetën Express e ka konfirmuar zëdhënësja e Gjykatës Supreme, Antigona Lutfiu-Uka.
“Kolegji i Gjykatës Supreme, në seancën e mbajtur më datë 30 dhjetor 2024, e ka hedhur poshtë si të palejuar ankesën e subjektit politik Vetëvendosje, të paraqitur kundër vendimit të Panelit për Ankesa dhe Parashtresa (PZAP)”.
Komisioni Qendror i Zgjedhjeve me këtë aktvendim urdhërohet që ta certifikojë subjektin politik Lista Serbe dhe kandidatët e këtij subjekti për zgjedhjet në Kuvendin e Republikës së Kosovës, që do të mbahen më 09.02.2025, thuhet në aktvendimin e gjykatës.
Më 23 dhjetor, përfaqësuesit e Lëvizjes Vetëvendosje në KQZ votuan kundër certifikimit të Listës Serbe me arsyetimin se kjo parti s’e njeh shtetin e Kosovës dhe se ka përdorur termin “Kosova dhe Metohia”.
Pas kësaj, Lista Serbe u ankua te Paneli Zgjedhor për Ankesa dhe Parashtresa, i cili më pas ka anuluar vendimin e Komisionit Qendror të Zgjedhjeve dhe e ka urdhëruar atë që ta certifikojë Listën Serbe.
Të premten, Vetëvendosja bëri ankesë në Gjykatën Supreme, e cila po ashtu e hodhi poshtë ankesën.
Në mbledhjen e KQZ-së vetëm kryetari i saj, Kreshnik Radoniqi, kishte votuar për certifikimin e Listës Serbe, ndërsa dy anëtarët e Vetëvendosjes, Sami Kurteshi dhe Alban Krasniqi, votuan kundër dhe të tjerët abstenuan.
Fillimisht, moscertifikimi i Listës Serbe nga KQZ-ja tërhoqi kritika e shqetësime nga Shtetet e Bashkuara, Bashkimi Evropian e Gjermania.
Në reagimet e tyre të ngjashme, ata u shprehën se janë të shqetësuar për përfshirjen “e kritereve të motivuara politikisht” dhe u tha se procesi i certifikimit duhet të bëhet mbi baza të standardeve ligjore dhe procedurave në përputhje me ligjet dhe se ky proces nuk duhet të politizohet.
