Bajraktari
15 vjet më parë ëndrra u bë realitet
Kur e nisëm punën në Washington, gati askush nuk dinte emrin Kosovë – lavdi e respekt për ata që punuan pa u lodhur e ata që sakrifikuan gjithshka që të vinte kjo ditë e madhe e pavarësisëIsha djalë i ri kur bashkë me familjen u detyruam të ikim nga Kosova dhe pas një qendrimi të shkurtër në Itali, u vendosëm përfundimisht në SHBA.
Kosova në atë kohë ishte pjesë e Jugosllavisë dhe shqiptarët ishin të diskriminuar. U rrita në Amerikë, formova familjen time, hapa biznesin tim, por mendjen e kishim gjithmonë te Kosova. Prindërit, Metë dhe Zisa Bajraktari, na kishin rritur me dashuri për atdheun e asnjëherë nuk u ndamë me zemër nga vendlindja.
Ëndërronim se një ditë Kosova do të bëhej e lirë dhe e pavarur, por ishte vetëm ëndërr. Në fakt, situata në Kosovë vetëm sa po keqësohej. Dhuna e vitit 1981, heqja e autonomisë në 1989, largimi nga puna e gati gjithë popullsisë shqiptare. Shqiptarët e Amerikës nuk mund të rrinin duarkryq.
U bashkova me përpjekjet e disa miqve shqiptaro-amerikanë si vëllezërve Bitici, Prof. Sami Repishti, Jim Xhema, e të tjerë që po lobonin bashkë me kongresistin Dioguardi në Washington. Kishim zbuluar se Kosova pothuaj nuk njihej fare si emër. Por kishim gjetur edhe miq që ishin gati të na dëgjonin dhe ndihmonin, si Senatori Bob Dole, Senatori Al D’Amato, kongresisti Tom Lantos.
Zona ku punoja kishte zgjedhur një kongresist të ri dhe shkova ta takoj. Quhej Eliot Engel. I fola për Kosovën dhe më dëgjoi e më premtoi se do të na ndihmonte. Më kërkoi më shumë informacion dhe ia dërgova. Shpejt u bëmë miq të ngushtë e filluam një bashkëpunim që vazhdoi më shumë se tre dekada. Në vitin 1991, bashkë me partnerin në biznes Rrustem Gecaj themelova gazetën “Illyria” që ta ndihmonim edhe më shumë Kosovën dhe çështjen kombëtare.
Presidentin Rugova sa herë që vinte në SHBA e mbaja si mik në shtëpi dhe e shoqëroja në takimet në Washington. Po ashtu edhe me shumë miq të asaj kohe si Dr. Alush Gashi e plot të tjerë. Themeluam degën e LDK-së në SHBA, më pas Këshillin Kombëtar Shqiptaro Amerikan etj. Gjatë atyre viteve të vështira shumë herë jemi zhgënjyer e mërzitur. Por asnjëherë nuk e kemi humbur besimin se liria dhe pavarësia do të vinin.
Kur babai vdiq në 1998, më la amanet që ta vazhdoja punën për Kosovën deri në fund. Në varrimin e tij, kongresisti Engel premtoi se liria për Kosovën po vinte. Engel ishte nga ata miq të rrallë që asnjëherë nuk hoqi dorë nga kërkesa për pavarësi e Kosovës, edhe kur zyrtarët amerikanë na thonin se nuk mund të ketë ndarje.
Pa qëndresën e madhe të popullit shqiptar në Kosovë, pa udhëheqjen e urtë dhe të mënçur të Presidentit Ibrahim Rugova, pa luftën heroike të Ushtrisë Çlirimtare të Kosovës, pa ndihmën dhe lobimin e diasporës, dhe pa ndihmën e miqve tanë të mëdhenj në Washington, nuk do të kishte as liri dhe as pavarësi të Kosovës.
Jam krenar që më dha Zoti mundësinë të jetoj në Amerikë e të jap kontribut për Kosovën dhe kombin shqiptar. 15 vjet më parë kur pavarësia u bë realitet dy njerëz të rëndësishëm për mua nuk jetonin më. Babai im Metë Bajraktari dhe miku im Presidenti Ibrahim Rugova. Është i vetmi peng që kam që ata nuk jetuan ta shohin ngjarjen e madhe.
Sot, me rastin e këtij përvjetori i falenderoj të gjithë miqtë e mi shqiptaro-amerikanë dhe nuk kursyen asgjë për kauzën e kombit tonë shqiptar. Falenderoj familjen që më ndihmoi që të angazhohem për Kosovën dhe për kombin. Falenderoj miqtë e ngushtë amerikanë, sidomos mikun tim ish-Kryetarin e Komitetit të Punëve të Jashtme në Kongres, Eliot Engel, për këmbënguljen dhe dedikimin për lirinë dhe pavarësinë e Kosovës.
Gëzuar popullit të Kosovës. Urime 15-vjetori! Mos e harroni rëndësinë e lidhjes me komunitetin shqiptar në Amerikë dhe me aleaten tonë të madhe Amerikën. Zoti e bekoftë Republikën e Pavarur të Kosovës!
Harry Bajraktari është themeluesi dhe ish-botues i gazetës “Illyria” (1991-1998). Ai është një veprimtar, biznesmen dhe filantropist shqiptaro-amerikan, i nderuar me shumë çmime mes tyre edhe Nderi i Kombit nga Presidenti i Shqipërisë, Medalja Presidenciale e Kosovës për Merita si dhe Dekorata e Thirrjes Presidenciale për Shërbim nga Shtëpia e Bardhë në SHBA.
Sqarim: Të gjitha opinionet në këtë rubrikë reflektojnë qëndrimet e autorit/autorëve e jo domosdoshmërisht të NGB “Zëri” SHPK
