Salah, afër rekordit të ri para largimit nga Liverpooli
Sulmuesi i Liverpool, Mohamed Salah, pritet të largohet nga “Anfield” në fund të qershorit, duke mbyllur një periudhë të artë në karrierën e tij me klubin anglez.
Gjatë nëntë viteve në ‘Anfield’, reprezentuesi egjiptian ka lënë gjurmë të jashtëzakonshme, duke fituar ndër të tjera Ligën e Kampionëve dhe dy tituj të Premier League, si dhe një sërë trofesh të tjerë të rëndësishëm.
Salah renditet aktualisht i treti në listën e golashënuesve më të mirë në historinë e klubit, pas Roger Hunt dhe Ian Rush, duke kaluar emra legjendarë si Steven Gerrard, Robbie Foëler dhe Kenny Dalglish.
Në 440 paraqitje për Liverpoolin, 33-vjeçari ka regjistruar 379 kontribute direkte në gola (gola dhe asistime), një shifër që e rendit ndër lojtarët më produktivë në historinë e futbollit anglez.
Para largimit të tij të mundshëm nga “Anfield”, Salah synon të mbyllë sezonin me një tjetër rekord personal. Ai aktualisht ndan vendin e parë në listën e asistimeve në Premier League për Liverpoolin (92), së bashku me Steven Gerrard, dhe ka mundësinë ta kalojë këtë shifër në ndeshjet e fundit.
Trajneri i Liverpoolit, Arne Slot, ka konfirmuar se Salah është i gatshëm për përballjen ndaj Aston Villa, pas një problemi në kofshë që e mbajti jashtë dy ndeshjeve të fundit.
Pritet që ai të nisë nga stoli në këtë sfidë, ndërsa mund të ketë minuta edhe në ndeshjen e fundit në “Anfield” ndaj Sunderland, ku tifozët pritet t’i rezervojnë një lamtumirë emocionale një prej ikonave më të mëdha të klubit.
