Kosova një hap larg Botërorit – FFK-ja thirrje tifozëve: Bëhuni zëri i historisë

Federata e Futbollit e Kosovës (FFK) ka bërë thirrje për gjithë tifozët që të jenë pjesë e momentit historik sonte në stadiumin “Fadil Vokrri”. Në prag të ndeshjes vendimtare që mund ta çojë Kosovën një hap larg Botërorit, FFK-ja i bën thirrje publikut të mbështesë ekipin me zë dhe pasion.

“Ka momente në histori që nuk përsëriten. Sot secili prej nesh duhet të jetë në këmbë, me zërin në maksimum dhe zemrën që rreh për një emër të vetëm: Kosovë”, shkruan FFK-ja në komunikatën e saj.

Federata thekson se stadiumi nuk është vetëm vend për të parë ndeshjen, por një arenë ku çdo metër i fushës fitohet edhe nga energjia e tifozëve. Respekti ndaj kundërshtarit duhet të mbetet gjatë himnit, por sapo topi nis të rrokulliset, stadiumi duhet të bëhet një forcë shtytëse për lojtarët e Dardanëve.

FFK-ja thekson se ky moment nuk është vetëm sportiv. “Bileta për në Botëror është mundësi për të treguar Kosovën para botës, për të promovuar identitetin, historinë dhe krenarinë tonë”, thuhet më tej.

“Beso. Këndo. Brohorit. Historia mund të shkruhet me zërin tënd. Forca Kosovë!” përfundon komunikata. /Zëri

FFK-ja shkruan:

Bëhu zëri i historisë, sonte është momenti!

Ka momente në histori që nuk përsëriten. Momente që nuk vijnë dy herë, që nuk të japin luksin e hezitimit. Sonte është një i tillë.

Sot nuk është ditë për të qëndruar ulur në tribunat e stadiumit. Nuk është mbrëmje për ta parë ndeshjen si spektatorë të qetë. Sot është momenti kur secili prej nesh duhet të jetë në këmbë, me zërin në maksimum, me zemrën që rreh për një emër të vetëm: Kosovë.

Jemi vetëm një hap larg Botërorit. Një hap që për shumëkënd ka qenë ëndërr e largët për dekada. Një shans që mund të vijë vetëm një herë në jetën tonë. Dhe kur historia të troket në derë, nuk hapet me heshtje, hapet me zhurmë, me pasion, me shpirt.

Stadiumi nuk është teatër. Nuk ka skenar të shkruar, nuk ka audiencë pasive. Ka vetëm një rol për të gjithë: të jemi lojtari i dymbëdhjetë. Dardanët në fushë kanë nevojë për atë shtysë që nuk matet me statistika, por ndjehet në çdo sprint, në çdo duel, në çdo goditje.

Respekti për kundërshtarin është vlerë dhe duhet të mbetet i tillë sidomos gjatë intonimit të himnit, pasi përballemi me një shtet mik.

Por sapo topi të nisë të rrokulliset, stadiumi “Fadil Vokrri” duhet të shndërrohet në një arenë ku edhe kundërshtari i sotëm e ndjen peshën e një kombi të tërë. Një vend ku çdo metër i fushës fitohet edhe nga tribuna.

Mos e ndal këngën kur topin e kemi ne. Mos e ndal atmosferën kur e kanë ata. Sepse energjia që krijohet nga tribuna është më shumë se atmosferë, është presion, është motivim, është avantazh.

Bileta për në Botëror nuk është vetëm një arritje sportive. Është një mundësi për të treguar Kosovën para botës, për të promovuar identitetin, historinë dhe krenarinë tonë në skenën më të madhe të futbollit.

Sonte nuk luan vetëm një ekip. Sonte luan një komb i tërë.

Beso. Këndo. Brohorit.

Sepse sonte, historia mund të shkruhet me zërin tënd.

Forca Kosovë!