Hansi Flick flet për ambicien e Barcelonës këtë vit në Ligën e Kampionëve

Trajneri i Barcelonës, Hansi Flick, ka riafirmuar ambicien e klubit për të fituar Ligën e Kampionëve, duke e cilësuar këtë si objektivin kryesor për të gjithë skuadrën.

Ai theksoi se fitimi i këtij trofeu është ëndrra e çdo lojtari që mban fanellën e Barcelonës.

“Fitimi i Ligës së Kampionëve është ëndrra e çdo njeriu në futboll. Ky është qëllimi kur luan për Barçën. Ky lloj titulli është objektivi ynë dhe ne jemi të gatshëm për këtë,” deklaroi ai.

“Ne përpiqemi të përmirësohemi në çdo ndeshje. Jemi një ekip shumë i ri dhe të gjithë ende kemi potencial për të arritur një nivel më të lartë,” shtoi ai.

Flick pranoi se gjysmëfinalja e sezonit të kaluar shërben si motivim shtesë dhe theksoi përkushtimin e skuadrës për të ecur përpara.

“Ne besojmë se ende kemi shumë potencial,” tha ai, duke nënvizuar nevojën për përmirësim të vazhdueshëm në çdo ndeshje për të arritur suksesin në Evropë dhe për të sjellë trofeun që duan tifozët e Barcelonës.