Zbulohet arsyeja se pse Paul Pogba s’ka luajtur ende pas rikthimit në futboll

Arsyeja pse Paul Pogba ende nuk ka luajtur, pavarësisht se është rikthyer në futboll tre muaj më parë, është zbuluar.

Pogba, 32 vjeç, fillimisht u dënua me katër vite pezullim pasi doli pozitiv me DHEA – një substancë që nxit prodhimin e hormoneve në trup, përfshirë testosteronin.

Megjithatë, francezi arriti ta ulë dënimin në 18 muaj pas një apelimi të suksesshëm.

Pas përfundimit të pezullimit, Pogba nënshkroi me klubin e Ligue 1, AS Monaco, në qershor.

Megjithatë, ish-ylli i Manchester United dhe Juventus ende nuk ka zbritur në fushë për klubin e tij të ri, ndonëse sezoni 25/26 ka hyrë gati në muajin e tretë.

Duke folur në korrik, Drejtori i Përgjithshëm i Monacos, Thiago Scuro, tha:

“Ne presim një proces tre-mujor. Sporti në nivele të larta lidhet shumë me shkencën dhe nuk është i lehtë. Monaco është një nga skuadrat më intensive në Ligue 1 dhe luan me një stil që kërkon përgatitje të lartë fizike.”

Tani, trajneri i Monacos, Adi Hutter, ka deklaruar se Pogba është gjithnjë e më afër rikthimit në formë të plotë dhe po e përmbush mirë programin stërvitor të dhënë nga klubi.

Është përmendur gjithashtu se Pogba nuk do të nxitohet për t’u rikthyer, pavarësisht krizës së dëmtimeve që po kalon ekipi.

Hutter tha: “Nuk mund të krahasojmë situatën e Paul Pogba-s me atë të Ansu Fati-t. Fati është shumë më i ri se Paul. Ansu ka kohë që po stërvitet. Sot, Paul po aktivizohet gjithnjë e më shumë.
Ne jemi në procesin tonë. I kemi dhënë vetes tre muaj. Ai po i afrohet grupit. Është mirë fizikisht dhe mendërisht.”

Ai shtoi: “Është një mundësi. Me të dëmtuarit, ne e shohim situatën, por nuk ka kuptim të fusim dikë vetëm për të thënë që kemi dikë.”

Më parë është raportuar se Pogba mund të bëjë rikthimin e shumëpritur pas pushimit të tetorit për ndeshjet ndërkombëtare.

Monaco do të rikthehet në fushë këtë të shtunë në Ligue 1, kur do të përballet me Lorient në Stade du Moustoir.