Rashfordi vlerëson Barcelonën për ndihmën që iu dha për t’u bërë lojtar më i mirë

Marcus Rashford e ka lavdëruar Barcelonën për ndihmën që ia ka dhënë për t’u bërë një “lojtar më i mirë” dhe ka falënderuar trajnerin Hansi Flick për rikthimin e vetëbesimit të tij.

27-vjeçari, i huazuar nga Manchester United, shënoi dy gola me cilësi të jashtëzakonshme për të ndihmuar në sigurimin e një fitoreje 2-1 të Barcelonës në ndeshjen hapëse të Ligës së Kampionëve kundër Newcastles të enjten mbrëma.

Në vetëm 90 minuta, Rashfordi ka shënuar po aq gola kundër kundërshtarëve të Premierligës sa ka arritur e gjithë skuadra e Manchester Unitedit gjatë gjithë sezonit.

“Po mësoj shumë, është një stil i ri futbolli”, tha ai për TNT Sports.

“Por po më bën një lojtar më të mirë. Sinqerisht, është një përvojë e mrekullueshme. Gjithmonë kam qenë një admirues i madh i Barcelonës, çdo lojtar i moshës sime i ka parë ata të luajnë, është futboll i mrekullueshëm”.

Duke folur për ndikimin e trajnerit të Barcelonës, Hansi Flick, Rashfordi tha: “Ai është shumë i rëndësishëm. Ndjej besimin që më ka dhënë. E dija që ai ishte një menaxher i nivelit të lartë para se të vija këtu, por të punoj me të është një kënaqësi. Shpresoj që marrëdhënia e mirë do të vazhdojë për pjesën tjetër të sezonit. Sigurisht, të gjithë ëndërrojnë të fitojnë Ligën e Kampionëve. Tani që jam te Barcelona, ëndrra është me Barcelonën. Shpresoj që të mund ta fitojmë turneun, ka një besim shumë të mirë. Shpresojmë që të mund të shkojmë ndeshje pas ndeshjeje dhe të vazhdojmë të përmirësohemi si ekip”, u shpreh ai.

Pas fitores, Rashfordi foli gjithashtu mbi perspektivën e të ardhmes së tij në Spanjë për një kohë të gjatë.

Barcelona ka një opsion blerjeje prej 26 milionë funtesh në fund të marrëveshjes së huazimit për ta bërë transferimin e tij të përkohshëm të përhershëm.

“Sa më shumë sezone të jetë e mundur. Do ta shohim”, tha Rashfordi kur u pyet për kohëzgjatjen e qëndrimit të tij te Barça.

“Duhet të përqendrohem në përpjekjen për të bërë punën time dhe për të ndihmuar ekipin në çfarëdo mënyre që mundem”. /Zëri