Man Utd fiton me rezultat të ngushtë ndaj Burnleyt

Manchester United ka fituar me rezultat të ngushtë 3-2 në shtëpi ndaj Burnleyt në kuadër të xhiros së tretë në elitën e futbollit anglez.

Në minutën e 17-të Unitedi mendoi se kishte fituar penallti pas një ndërhyrje të Kyle Walker ndaj Mason Mount, por pas rishikimit në VAR gjyqtari e anuloi vendimin e tij.

‘Djajtë e Kuq’ kaluan në epërsi në mintuën e 27-të falë një autogoli të shënuar nga Josh Cullen për 1-0.Man Utd 

Mason Mount në minutën e 40-të iu afrua seriozisht golit, por goditja e tij me kokë u ndal nga traversa.

Në minutën e 45-të edhe Amad Diallo pati një goditje tejet të fuqishme e cila u prit në mënyrë fantastike nga portieri mysafir.

Me të filluar pjesa e dytë, Burnley ia doli të barazojë shifrat në 1-1 përmes Lyle Foster i cili realizoi në minutën e 56-të.

Sidoqoftë, ky gëzim i mysafirëve nuk zgjati shumë pasi menjëherë në aksionin vijues Unitedi riktheu epërsinë me anë të Bryan Mbuemos (57’) që realizoi për 2-1 pas asistimit nga Diogo Dalot.

Ky gol i pësuar nuk i zmbrapsi mysafirët të cilët ia dolën të barazojnë sërish, kësaj radhe përmes Jaidon Anthony (66’) i cili shënoi për 2-2 pas një topi të kthyer brenda zonës.

Kur dukej se ndeshja do të përfundonte baras, vendasit fituan penallti në minutën e 94-të të cilën e shndërroi në gol Bruno Fernandes për 3-2.

Kjo ishte fitorja e parë e Unitedit këtë sezon në Ligën Premier, pas disfatës ndaj Arsenalit dhe barazimit ndaj Fulhamit.