Ardit Tahiri prezantohet me fanellën e HJK Helsinki

Sulmuesi kosovar Ardit Tahiri është zyrtarisht futbollisti më i ri i klubit finlandez HJK Helsinki, pas prezantimit që u bë sot.

22-vjeçari i është bashkuar gjigantit të futbollit finlandez në formë huazimi nga KF Llapi, me një opsion blerjeje në fund të sezonit.

Tahiri sjell fizikalitet dhe alternativa të reja në repartin ofensiv të HJK-së. Ai është i njohur për lojën e tij si sulmues qendror klasik, por njëkohësisht edhe për aftësinë për të shënuar gola në mënyra të ndryshme.

“Jam shumë i lumtur për këtë hap të madh në karrierë. HJK është klubi më i madh në Finlandë dhe synimi im është të ndihmoj ekipin të fitojë titullin. Do të jap gjithçka për këtë fanellë”, kishte deklaruar Tahiri para disa ditësh kur u arrit marrëveshja.

Në sezonin e kaluar me KF Llapi, ai shënoi 16 gola në 33 paraqitje, duke u konfirmuar si një nga sulmuesit më premtues të futbollit kosovar.

Tahiri ka mbërritur në Helsinki dhe do të jetë gati për debutimin e tij me klubin në javët e ardhshme.