Cambiaso merr dënim me dy ndeshje për karton të kuq, humbet Derbin e Italisë ndaj Interit
Andrea Cambiaso do të mungojë në dy ndeshjet e ardhshme të Juventusit në Serie A, pasi është pezulluar për sjellje të dhunshme në përballjen e fituar 2-0 ndaj Parmës në hapje të sezonit 2025/26.
Mbrojtësi i krahut, i cili është pjesë e kombëtares italiane, u përjashtua shtatë minuta para fundit të ndeshjes, pasi goditi me bërryl mbrojtësin e Parmës, Mathias Fjortoft Lovik, gjatë një përplasjeje në vijën anësore.
Gjyqtari Matteo Marcenaro nuk hezitoi ta ndëshkonte me karton të kuq direkt, pas kësaj lëvizje.
Me këtë vendim, Cambiaso do të humbasë ndeshjen e radhës të Juventusit ndaj Genoas, ekipit të tij të parë, si dhe supersfidën e “Derby d’Italia” kundër Interit pas pushimit të kombëtareve.
Pezullimi i tij nuk ndikon te përfaqësuesja italiane, ndaj lojtari mbetet i disponueshëm nëse trajneri Gennaro Gattuso e përfshin në listën e Italisë për ndeshjet e këtij muaji.
