Zvicra humb yjet shqiptarë, 14 lojtarë zgjodhën Shqipërinë dhe Kosovën
Mediumi zviceran “Nau.ch” ka publikuar një analizë të detajuar lidhur me futbollistët premtues shqiptarë të rritur në Zvicër, të cilët në një moment të karrierës së tyre vendosën të mos përfaqësojnë Zvicrën, por të zgjedhin një nga kombëtaret e tyre të origjinës, Shqipërinë ose Kosovën.
Ky reagim vjen pas vendimit të fundit të futbollistit Eman Kospo, i cili zgjodhi të përfaqësojë Bosnjë-Hercegovinën, pavarësisht se kishte të drejtë të luante edhe për Zvicrën.
Sipas “Nau.ch”, një numër i konsiderueshëm futbollistësh me prejardhje shqiptare, të cilët janë zhvilluar në akademitë zvicerane dhe kanë përfaqësuar grupmoshat e Zvicrës, në faza të ndryshme kanë vendosur të ndryshojnë kombëtare.
Në total, mediumi rendit 14 futbollistë shqiptarë që kanë përfaqësuar ose përfaqësojnë aktualisht Shqipërinë dhe Kosovën.
“Të gjithë janë shtetas zviceranë, por kanë zgjedhur të përfaqësojnë një kombëtare tjetër. Rasti më i fundit është Eman Kospo”, shkruan “Nau.ch”, duke përmendur edhe raste të lojtarëve të tjerë me prejardhje nga Ballkani që kanë pasur mundësi të luajnë për Zvicrën, si boshnjakë apo kroatë.
Në artikull përmendet rasti i Nedim Bajramit, i cili ka zhvilluar 51 ndeshje për grupmoshat e Zvicrës, por zgjodhi Shqipërinë në vitin 2021. Bajrami bëri histori duke shënuar golin më të shpejtë ndonjëherë në një Kampionat Evropian, në ndeshjen kundër Italisë në “Euro 2024”.
Përmendet gjithashtu Florent Hadërgjonaj, i cili kishte zhvilluar një ndeshje miqësore me Zvicrën, por në vitin 2019 njoftoi se do të përfaqësonte Kosovën. Aktualisht, ai ka luajtur 38 ndeshje me Kosovën, duke kontribuar me një gol dhe katër asistime në kualifikime evropiane dhe botërore.
Ndër rastet e veçanta është ai i Albert Bunjakut, aktualisht përzgjedhës i Kosovës U19. Bunjaku ka zhvilluar gjashtë ndeshje me Zvicrën dhe tre me Kosovën, pasi ky ndryshim u lejua pas pranimit të Kosovës në UEFA në vitin 2016.
Përmendet edhe rasti i Amir Shaipit, portier i Luganos, i cili ka luajtur 18 ndeshje për grupmoshat e Zvicrës, por së fundmi ka vendosur të përfaqësojë Kosovën, për shkak të konkurrencës së lartë në repartin e portierëve në kombëtaren zvicerane.
Lista e futbollistëve shqiptarë që zgjodhën Kosovën:
Bledian Krasniqi – 38 ndeshje me të rinjtë e Zvicrës
Toni Domgjoni – 25 paraqitje me të rinjtë e Zvicrës
Benjamin Kololli – pa paraqitje me grupmoshat e Zvicrës
Betim Fazliji – 2 paraqitje me të rinjtë e Zvicrës
Mirlind Kryeziu – 23 paraqitje me të rinjtë e Zvicrës
Florent Hadërgjonaj – 1 ndeshje me ekipin A të Zvicrës (miqësore), më pas kaloi te Kosova
Amir Shaipi – 18 paraqitje me grupmoshat e Zvicrës
Lista e futbollistëve shqiptarë që zgjodhën Shqipërinë:
Nedim Bajrami – 51 paraqitje me grupmoshat e Zvicrës
Amir Abrashi – 43 paraqitje me të rinjtë e Zvicrës
Taulant Xhaka – 44 paraqitje me të rinjtë e Zvicrës
Frederic Veseli – 57 paraqitje me të rinjtë e Zvicrës
Shkëlzen Gashi – 46 paraqitje me të rinjtë e Zvicrës
Berat Gjimshiti – 20 paraqitje me të rinjtë e Zvicrës. /Rtk
