Leard Sadriu e favorizon FCSB-në kundër Dritës, por thotë se “Intelektualët” mund ta bëjnë ndryshimin
Përballja mes Dritës dhe ekipit rumun FCSB zhvillohet të enjten në mbrëmje, në orën 20:00, në Prishtinë, në ndeshjen e dytë të rundit të tretë kualifikues të Ligës së Evropës.
Në ndeshjen e parë, Drita po fitonte 2-0, por FCSB-ja u rikthye në lojë dhe fitoi 3-2.
Për sfidën e dytë, që do të luhet në “Fadil Vokrri”, ka folur Leard Sadriu, mbrojtësi i Kombëtares së Kosovës, i cili luan për ekipin rumun Arges Pitesti.
Në një intervistë për “Gazeta Sporturilor”, ai thotë se Drita mund të bëjë befasi dhe të shkruajë histori, ndonëse Steauan e konsideron favorite.
Një kualifikim me siguri do t’i siguronte Dritës jo vetëm një vazhdimësi në play-off-et e Europa League, por edhe një vend të sigurt në grupin e Ligës së Konferencës. Gjë që do të ishte një premierë për Dritën.
Në lidhje me rezultatin e ndeshjes së parë, Sadriu tha se është një avantazh i vogël për FCSB-në, sepse “normalisht ata kanë një gol shtesë në fillim të ndeshjes së dytë”.
“Por mendoj se nuk do të jetë një ndeshje e lehtë as për rumunët… Mendoj se Drita ka disa nga tifozët më të mirë në Kosovë (“Intelektualët”) dhe do të jetë një mbështetje e mirë për ekipin, duke u përpjekur të bëjë të pamundurën dhe të shkruajë histori me ekipin. Kjo sepse (Drita) nuk ka luajtur kurrë në asnjë fazë grupesh në garat evropiane dhe klubi e dëshiron vërtet këtë”.
“Nuk di sa mund ta ndryshojë rrjedhën e ndeshjes një gol i vetëm. Le ta shohim, por siç ju thashë, mendoj se FCSB mbetet favoriti. Por në futboll, skuadra më e mirë nuk fiton gjithmonë”, deklaroi Sadriu, transmeton Klankosova.tv.
Duke folur për situata aktuale në vendin tonë, ai tha se “Kosova është një vend shumë i sigurt dhe i qëndrueshëm, ku mund të jetosh në paqe dhe gjithçka është perfekte”.
“Ka shumë vende për të parë, shumë restorante dhe jam i sigurt se do ta pëlqeni. Do të keni shumë vende ku mund të hani dhe të shijoni momente të bukura. Gjatë kësaj periudhe është shumë e mbushur me njerëz për shkak të festave, por mendoj se jeni mësuar me Bukureshtin dhe nuk do të jetë një surprizë për ju (qesh)”, u shpreh mbrojtësi i Kosovës, Leard Sadriu.
