Xabi Alonso i ka kërkuar Real Madridit transferimin e yllit të Bayer Leverkusenit

Real Madrid është tashmë duke planifikuar lëvizjen e radhës në afatin kalimtar, dhe të gjitha shenjat tregojnë se përforcimi i ardhshëm do të jetë në mbrojtje. 

Me Xabi Alonson të vendosur për të konsoliduar skemën me tre qendërmbrojtës, e cila u përdor me sukses kundër Salzburgut në fazën e grupeve të Kupës së Botës për Klube, drejtuesit e Realit kanë përqendruar vëmendjen te një i njohur i vjetër i trajnerit: Piero Hincapie. 

Qendërmbrojtësi ekuadorian, i cili është stërvitur më parë nga Alonso te Bayer Leverkusen, po shihet si kandidati ideal për këtë sistem të ri në mbrojtje. 

Trajneri bask ka qenë i qartë për profilin që kërkon, një mbrojtës që jo vetëm di të mbyllë hapësirat, por që gjithashtu ka aftësinë për të ndërtuar lojën nga prapa me zgjuarsi. 

Në këtë aspekt, Hincapie ofron garanci. Në moshën 22-vjeçare, futbollisti i Amerikës së Jugut ka treguar pjekuri, lexueshmëri taktike dhe aftësi me topin, cilësi që e bëjnë atë një pjesë tërheqëse për projektin e ri të ‘Los Blancos’. 

Përveç përshtatjes taktike, edhe vlera e tij në treg e bën atë edhe më interesant. 

Lexo po ashtuLegjenda gjermane zbulon problemin e madh të Real Madridit: Xabi Alonso do ta ketë të vështirë

Vlerësohet se transferimi i tij mund të realizohet për një shumë rreth 40 milionë euro, një shumë e përballueshme për Real Madridin nëse arrin të realizojë disa shitje të rëndësishme. 

Ndër emrat që mund të sakrifikohen janë Rodrygo dhe Eduardo Camavinga, futbollistë që vlerësohen lart në Evropë dhe që mund të sjellin të ardhura të konsiderueshme.