Gjashtë muaj më parë e humbi gruan, asistenti i Luis Enriques e përloti botën mbrëmë pasi e shkroi historinë me PSG-në

Paris Saint-Germain shkroi histori në Mynih me një fitore të jashtëzakonshme 5-0 ndaj Interit, duke siguruar titullin e parë në histori në Ligën e Kampionëve. Golat nga Achraf Hakimi, Désiré Doué (dy herë), Khvicha Kvaratskhelia dhe Senny Mayulu vulosën një triumf rekord për gjigantët francezë. Por pas festës, dhimbja personale jehonte në fushë.

Trajneri Luis Enrique bëri një homazh emocional për vajzën e tij të ndjerë, Xana, e cila u nda nga jeta në vitin 2019 në moshën nëntëvjeçare. I veshur me një bluzë që kishte logon e Fundación Xana, ai u ul në gjunjë mbi barin e “Allianz Arena” pas vërshëllimës përfundimtare dhe tregoi emrin e saj, duke i dhënë lamtumirën në mënyrën më kuptimplotë.

Pranë tij, asistenti i tij i përhershëm Rafael Pol përjetoi momentin më të ëmbël dhe të hidhur të karrierës së tij. 38-vjeçari, që ka qenë krah Enrique-s që nga koha te Barcelona, kohët e fundit humbi gruan e tij, Raquel, pas një sëmundjeje të gjatë. Gjashtë muaj më vonë, Pol u pa duke qarë buzë fushës — jo vetëm nga gëzimi, por edhe nga dhimbja dhe reflektimi.

Lotët e Pol flisnin për më shumë se një fitore. Teksa PSG ngrinte për herë të parë trofeun e Ligës së Kampionëve, ai qëndronte në heshtje, i përfshirë nga emocionet, duke vajtuar mungesën e partneres së jetës në një nga netët që duhej të ishte më krenarja e karrierës së tij profesionale.