Kosova, e 26-ta në ranglistën e EHF-së

Pas përfundimit të Kampionatit Botëror për hendbollistë, Federata Evropiane e Hendbollit ka publikuar ranglistën e ekipeve kombëtare në të dyja konkurrencat për periudhë katërvjeçare.

Për bazë janë marrë rezultatet në katër ngjarjet e fundit të mëdha, duke përfshirë kualifikimet.

Te femrat, Kombëtarja jonë është në pozitën e 26-të me 17,25 pikë.

Prapa Kosovës janë Kombëtare si Ishujt Faroe, Finlanda, Izraeli, Rusia, Luksemburgu, Bosnjë-Hercegovina, Lituania, Letonia, Azerbajxhani, Bullgaria e plot të tjera.

Norvegjia është e para, e përcjellë nga Franca, Danimarka, Suedia e Holanda. Te hendbollistët, Kombëtarja e Kosovës është e 35-ta me 14 pikë.

Letonia, Rusia, Qipro, Bullgaria, Britania e Madhe, Moldavia, Azerbajxhani janë disa prej Kombëtareve prapa Kosovës. Në listë janë 50 kombëtare, katër prej tyre pa pikë në mungesë të aktivitetit.

E para është Danimarka, kurse pas saj janë Franca, Gjermania, Suedia e Kroacia. /Zëri