Athletic Bilbao dhe Barcelona në kërkim të finales së Superkupës

Athletic Bilbao dhe Barcelona do ta kërkojnë një vend në finale të Superkupës së Spanjës.

Dy ekipet e La Ligas do të përballen mes vete sonte në ndeshjen gjysmëfinale të kësaj gare.

Bilbao e ka nisur mjaft mirë sezonin e ri dhe gjendet në vendin e katërt në kampionatin spanjoll me vetëm 7 pikë më pak se lideri, Real Madrid.

Nga ana tjetër, gjiganti katalunas pas fillimit të furishëm të edicionit të ri, kishte rënie në javët e fundit dhe ka përfunduar në vendin e tretë, me dy pikë më shumë se Bilbao.

Prandaj, sonte na pret një ndeshje e zjarrtë me dy skuadrat që do ta kërkojnë biletën e finales.

Sfida mes Athletic Bilbaos dhe Barcelonës do të nisë në orën 20:00.

Ndërsa, gjysmëfinalja tjetër do të luhet nesër mbrëma mes Real Madridit dhe Mallorcës së Vedat Muriqit.

Më pas, fituesit do të ndeshen mes vete në finalen e madhe, kur edhe do të përcaktohet fituesi i Superkupës së Spanjës.

Natyrisht, të gjithë do ta dëshironin një “El Clasico” në finale të këtij kompeticioni.