Neville: Guardiola dhe Man City duhet të rindërtohen

Pep Guardiola do të duhet të fillojë një rindërtim të skuadrës në Manchester City, pavarësisht se çfarë ndodh në fushë këtë sezon, sipas gazetarit Gary Neville të “Sky Sports”.

Guardiola ka duruar ecurinë më të keqe të karrierës së tij menaxheriale përpara ndeshjes së së dielës me liderët e ligës dhe rivalët e hidhur Liverpool.

Neville tha se nënshkrimi i një kontrate të re në Etihad nga Guardiola tregon se ai tashmë e di se skuadra e Manchester Cityt do të ketë nevojë për “ristrukturim” në periudhën afatshkurtër dhe afatmesme.

“Unë mendoj se ne patjetër po shohim fillimin e një rindërtimi – edhe nëse ata do të vazhdonin dhe do të bënin një gjë spektakolare si të fitonin Premierligë këtë sezon nga pozicioni i tyre dhe me formën e tyre aktuale”, tha Neville.

Por kjo skuadër do të ketë nevojë për një tranzicion.

“Mendoj se ideja është që ai ka ndërtuar tashmë dy skuadra dhe mendoj se ndoshta ka një ekip të tretë në mendje sepse ka zgjatur kontratën. Mendoj se është e parëndësishme ajo që ndodh këtë sezon. “Ky ekip do të ketë nevojë për një ristrukturim gjatë 12-18 muajve të ardhshëm”. /Zëri