Neymar entuziasti, i gatshëm për rikthimin e madh

Neymar është gjithnjë e më afër rikthimit të madh në futboll pas mungesës së gjatë.

Ylli brazilian ishte lënduar në tetor të vitit 2023, më saktësisht para një viti, ndërsa i ishte dashur ta bënte një intervenim kirurgjik pas lëndimit në gju.

Sidoqoftë, ish-futbollisti i Santosit, Barcelonës dhe Paris Saint-Germainit iu bashkua në stërvitje ekipit të tij, Al Hilal, duke e shfaqur entuziazmin e tij edhe përmes rrjeteve sociale.

“Jam kthyer. I lumtur që iu bashkova grupit. Gjithçka po shijoj tash”, shkroi përfaqësuesi brazilian, përcjell “Gazeta Express”.

Ndërkohë, trajneri i tij konfirmoi se rikthimi në fushën e blertë mund të ndodhë më së largu në janar të vitit 2025.

“Neymar është lojtar mjaft i rëndësishëm për ne dhe për ligën saudite në përgjithësi. Sidoqoftë, nuk mund ta specifikoj një datë fikse për rikthimin e tij. Ne duhet ta rishikojmë situatën në janar”, deklaroi ai.

Hera e fundit kur Neymar kishte zbritur në fushën e blertë ishte 17 tetori i vitit 2023 në kualifikimet jug-amerikane në ndeshje me Uruguain.

Aty e kishte pësuar një këputje të ligamenteve në gjurin e majtë.

Nga ajo kohë ai ka punuar fort në rehabilitimin dhe në përgatitjen për t’u rikthyer në fushën e blertë.