Alexander-Arnold i përgjigjet raportimeve se po synon blerjen e klubit të famshëm në Ligue 1

Trent Alexaner-Arnold nuk po përpiqet që të blejë aksionet e klubit të famshëm francez Nantes përkundër raportimeve që bënin me dije se është bërë një ofertë prej 100 milionë eurosh.

Raportime nga Franca kishin pretenduar se ylli i Liverpoolit ishte pjesë e një grupi që po përpiqeshin të marrin në pronësi klubin e Ligue 1.

Ishte sugjeruar se 25-vjeçari ishte në krye të kësaj oferteje së bashku me babain e tij, në përpjekje për të blerë klubin nga biznesmeni polak Waldemar Kita.

Tutje u la të kuptohet se oferta e dërguar në drejtim të Kitas ka qenë në regjionin e 80 milionë eurove për Nantes dhe një kredi shitësi prej 20 milionë eurosh, si dhe bonuse të ndryshme në vlerë prej 40 milionë eurove, pati madje edhe raportime se ai ka qenë i interesuar për një lëvizje të mundshme edhe për klubet e tjera si Saint-Etienne dhe Le Havre.

Por duket se ka shumë të pavërteta në këto raportime. Sipas Liverpool Echo, burime pranë Alexander-Arnold kanë konfirmuar se raportimet që anglezi po përgatitet që ta blejë klubin janë ‘plotësisht të pavërteta’.

Teksa duket që Alexander-Arnold nuk është i interesuar për blerjen e Nantesit, klubi në fakt mund të shitet së shpejti, pasi presidenti Kita kishte konfirmuar në 2022 se është i hapur ndaj ofertave.

“Nëse dikush mendon se mund ta mbajë klubin financiarisht dhe të jap siguri dhe se ata janë më të mirët, unë jam i hapur ndaj saj, nuk ka problem”, ka thënë Kita.

Nantes momentalisht mban pozitën e pestë në Ligue 1 pas një fillimi pozitiv të sezonit të ri. Ata kanë dy fitore nga katër ndeshjet e tyre hapëse ndërsa do të luajnë në udhëtim ndaj Angers këtë vikend. /telegrafi