Rapidi konfirmon largimin e Albion Rrahmanit, nga shitja e tij do të fitojë shumë edhe Ballkani

Albion Rrahmani do të largohet nga Rapid Bukureshti dhe kanë mbetur vetëm edhe disa orë që kjo gjë do të bëhet zyrtare.

Sulmuesi kosovar karrierën do ta vazhdoj në Republikën e Çekisë, ku do t’i bashkohet kampionëve të Sparta Pragës.

Shitja e tij te Sparta Praga është konfirmuar nga drejtuesit e klubit, derisa tani ka ardhur edhe konfirmimi i Rapidit.

Klubi rumun ka lajmëruar tifozët se Rrahmani është larguar nga kryeqyteti rumun për të udhëtuar drejt Pragë për vizitat mjekësore.

“Fatkeqësisht, historia e “Lewa” në Giulesti është drejt fundit, me sulmuesin tonë që u largua sot nga vendi për të bërë një vizitë mjekësore në një skuadër tjetër”.

“Kështu, Albioni nuk do të jetë më pjesë e skuadrës së Rapid për ndeshjen kundër Dinamos, por sigurisht që do të mbështesë djemtë nga larg”, thuhet në njoftimin e Rapidit.

Rrahmani pritet të transferohet te Sparta e Pragës për një shumë prej 5 milionë eurove, derisa Rapidi do ta ruaj edhe 15 për qind të kartonit nga shitja e ardhshme.

Kësisoj nga ky transferim i Rrahmanit do të fitoj edhe kampioni në fuqi i Kosovës, Ballkani.

Suharekasit kishin ruajtur 15 për qind të kartonit kur e shitën Rrahmanin dhe kjo ka dalë një gjë shumë e qëlluar.

Nga shitja e Rrahmanit prej 5 milionë eurove, në arkat e klubit kosovar Ballkani do të shkojnë 750 mijë euro.

Ballkani ka fituar 600 mijë euro nga shitja e Rrahmanit plus tani 750 mijë të tjera.