Mourinho vendos një rekord të jashtëzakonshëm në Turqi, pak muaj pas kalimit te Fenerbahçe
Jose Mourinho ka vendosur një rekord të ri, falë një prej transferimeve të tij të para si trajner i Fenerbahçes.
Ish-trajneri legjendar i Chelseat, Real Madridit dhe Interit u emërua në krye të ekipit turk në muajin qershor, pak kohë pas përfundimit të finales së Ligës së Kampionëve.
Ai menjëherë iu përvish punës, duke transferuar lojtarë të rinj, fillimisht Cenk Tosun, i cili u transferua si lojtar i lirë dhe më pas Allan Saint-Maximin, që u transferua në formë huazimi nga Al-Ahli.
Por blerja e tij e fundit është bërë transferimi më i shtrenjtë në histori të futbollit turk.
Lojtari në fjalë është sulmuesi Youssef En-Nesyri, i cili para se të kompletonte transferimin në Turqi ishte lidhur me një kalim në Premierligë.
Sidoqoftë, ai ka zgjedhur Fenerbahçen, duke nënshkruar një kontratë pesëvjeçare për shumën e 20 milionë eurove. Reprezentuesi maroken raportohet se ishte objektivi kryesor i Mourinhos dhe ai do të fitojë katër milionë euro në sezon.
Detyra e tij e parë do të jetë ta ndihmojë klubin e tij të ri të kualifikohet në Ligën e Kampionëve. Ata do të ballafaqohen me Luganon në ndeshjen e tyre të dytë të rundit kualifikues, pasi kanë fituar të parën me rezultat 4-3 në Zvicër.
Fenerbahçe duhet të fitojë edhe dy ndeshje të tjera për t’u kualifikuar në Ligën e Kampionëve, e cila do të debutojë me sistemin e ri këtë sezon. /Telegrafi
En Nesyri. pic.twitter.com/O4lrEwNn6R
— Fener Ajans ë (@ajansfenercom) July 26, 2024
